بۆچی لە هەولێر ڕۆکێت دەبارن.؟!

مستەفا شێخ محەمەد

لەم سەردەمەدا، هێز بڕیار ئەدات، کە تۆ کێیت، هەروەها هێز نیشانی ئەدات کە تۆ دەتوانی چی بکەیت و بگرە بۆشت هەیە چی بکەیت.!

کات و وزەیەکی زۆر لە هەرێم بەفیرۆدران، کە دەگونجا بکرێن بەسەرچاوەی بنیاتنانی هێز، بەڵام شتەکە بەسەرچوو، ئێستا هەرێم یاری پێکراوی نێوان بەهێزەکانە.

ئەزموونی ئەوانیدیکە گرنگە بۆ تێڕامان و بەراوردکاری، عێراق دەوڵەتێکە لە ناوچەکەدا خاوەن قورسایەکی زۆرە بەتایبەتی لە سیاسەتی وزە، ساڵی 1972 نەوتی خۆماڵی کرد، بەڵام دواتر عێراق توشی کۆمەڵێک قەیرانی درێژخایەن بوو، لە کاتێکدا دەوڵەتێکی بەحساب خاوەنی سەروەرییە و ئەندامی نەتەوەیەکگرتوەکانیشە.

کاتێک دەسەڵاتدارانی هەرێم بانگەشەی سەربەخۆیی ئابوورییانکرد، هیچ پێوانەییەکی زانستیی و سیاسییان ڕەچاونەکرد، هەر بۆیە وزە و کاتێکی زۆری ماڵی و مرۆیان بەفیرۆدا، گەلەکەیان ڕووبەڕووی کێشەیەکی قوڵ و درێژ مەودا کردۆتەوە، چونکە هیچ حسابێکیان بۆ ئەگەری گۆرانکاریەکانی ئایندە نەکردبوو، بێ منەتانە دەستیان بەدەرهێنان و هەناردەکردنی نەوت کرد.

لەم سیاسەتەدا هاوڵاتیانی هەرێمی کوردستان زەرمەندی یەکەمن، نەوت ئەروات پارە نایەتەوە و، گرێبەستەکان شەفاف نیین، حکومەتی هەرێم داوای پارە لە عێراق دەکات و ئەویش پڕسیاری داهاتەکان دەکات، لێکدانەوە ئابوورییەکان دەریدەخەن، ناڕوونی و گەندەڵیی و بەهەدەردانێکی زۆر هەیە.

لەگەڵ شکستی سیاسەتی نەوتی، دەسەڵاتدارانی هەرێمی کوردستان، بەوەش ناوەستێن و بە ئاشکرا، دەڵێت غاز هەناردە دەکەین، لە کاتێکدا کە دەبینن ئەو سیاسەتە قبوڵکراو نییە، تەنانەت ئیسرائیلیەکان کە خاوەنی سوپا و هێزێکی بێ وێنە و چەکی پێشکەوتوو و تەنانەت چەکیی ناوەکیشن بەو بێ منەتییە کارناکەن. هەروەها دەسەڵاتدارانی هەرێم سەرەڕای دۆخی ناهەمواری ناوخۆیان، بوونەتە تەڕەف و لایەنیش، لە کێشە و ئاڵۆزیەکانی ناوخۆییەکانی عیراق بەتایبەت لەمەسەلەی پێکهێنانی حکومەتی نوێی عیراق و درز خستنە نێوماڵی سیاسیی شیعە.

لە عێراق کێشەی زۆری کەڵکەبووی سیاسیی و ئابووریی و کۆمەڵایەتیی و تا ئیفیی هەیە، هەڵبژاردنێکی لاواز و بێ پشتیوانی و بەشداریی جەماوەری ئەنجام دراوە، پارتیی کە دەسەڵاتداری یەکەمی هەرێمە، بووەتە بەشێک لە کێشە و ململانێی نێوماڵی شیعە، ئەمەش نەک تەنها بەشێک لەلایەنە شیعییەکان بەڵکو دەوڵەتێکی خاوەنی هەژموونی وەک ئێرانیشی پەست و نیگەران کردووە.

ئێران کە باڵادەسترین هێزی دەرەکییە لەناو عێراقدا، بەئاشکرا ئەو پەیامەی بۆ هەولێر ناردووە، دەڵێت (هەنگاوە سیاسەکانتان بە دژی بەرژەوەندیەکانی عێراق و ئێران دەزانین)

بەپێی بیردۆزەکەی ئیسحاق نیوتن؛ هەموو کارێک کاردانەوەی هەیە، کاتێکیش دەسەڵاتدارانی هەرێم، حساب بۆ ئێران و بەرژەوەندیەکانی لە عێراق ناکەن، ئیتر ئەنجامەکەی وەک چۆن بە دادگای فیدراڵی نەوەستا، بەدڵنیاییەوە لە موشەکبارانکردنی ئەمجارەی هەولێریش ناوەستێت و شتی دیکەی خراپتریشی بەدواوە دەبێت.

ئەگەر بەچاوێکی بێ لایەنانە و دوور هەرا و مەعمەعەی میدیا و شڕۆڤەکارە گیرفان پڕەکانی سەر بەدەسەڵات و فرکان فرکانی بەیاننامەی حزبەکان لە هاوکێشەکان بڕوانیین. دەشێت ئەوانەی سەرەوە ،بەشێک بن لە هۆکارە گرینگەکانی ڕۆکێتبارانی هەولێر ، بەڵام گومانی تێدانییە، جگە لە مەترسی دووبارە بوونەوەی ڕۆکێتەکان ، مەترسی دیکەش وەک بەر ئەنجامی بێ مووچەیی و نەبوونی خزمەتگوزاریی و نەهامەتیی خەڵکی کوردستان، یەخەی حکومەتی هەرێم دەگرێ، رەنگە ئەوەش لە ئایندەیەکی نزیکدا سەرچاوەی کۆمەڵێک رووداوی مەترسیداریتر بێت..

بەڵام ئەگەر بە لۆژیکی نووسەر و سیاسیی و شڕۆڤەکارە خەیاڵپڵاوەکانی کوردایەتیی بۆ دۆخەکە بڕوانیین، ئەوە دەڵێین دژی ئەمریکایە، ئیسرائیلیەکان لێرە نیین، کۆمەڵێک شیعاراتی سۆز ئامێز ئەڵێیتەوە، دواجار چیی ڕوودەدات، ئەمریکا دێت ئەڵێ ئێمە نین، موقتەداش پاشەکشێ لە بەیاننانامەکەی ئەکات و دواجار سیاسیەکانیش ناوێرن ورته و فزەیەک بەرامبەری ئێران بکەن، کەچی هەندێک نووسەر و شت ڕادەسپێرن خۆیان بکەن بەدۆنکیشۆت.

لە کۆتایدا پرسیاری جەوهەری ئەوەیە ئایا ئەو سیاسەتەی هەرێم بەچ و بەکوێمان دەگەیێنت؟