هۆكاری خۆڵبارینەكە ئاشكرابوو بەهۆی خۆڵبارینەوە لە هەرێم 100 كەس رەوانەی نەخۆشخانە كران

سیروان ساڵح شارەزای بواری كەشناسی لەبارەی هۆکاری سەرەکی خۆڵبارین لە عێراق و هەرێمی کوردستان دەڵێت:ساڵانە لە ناوەڕاستی وەرزی بەهار و وەرزی پایز لەگەڵ هاتنی شەپۆلەکانی باران بارین و بە زۆریش پەستان نزمە خەماسینیەکان چالاکی با لە ناوچە بیابانییەکانی خۆرئاوای عێراق زیاد دەکات و دەبێتە هۆی درووستبوونی خۆڵبارین.
وتوشیەتی: لەئێستادا ناوچەیەكی فراوان لەنێوان هەولێر و ئەنبار توشی بە بیابانبوون بوون،لەبەرئەوەی سرووشتی ئەو ناوچانە بەهۆی کەمی بارانبارینەوە ڕووپۆشی ڕووەکی کەمە و خاکەکەی فشەڵ و لماوییە، کاتێک چالاکی با دەستپێدەکات خۆڵێکی زۆر بەهۆی کاریگەری بایەکەوە دەچێتە ئاسمان و بە ئاراستەی هەرێمی کوردستان و ناوچەکانی گەرمیان دێن.

لەماوەی 24 كاتژمێری رابردوودا بەهۆی خۆڵبارینەوە نزیكەی 100 كەس رەوانەی نەخۆشخانەكان كراون

بەجۆرێك لە چەمچەماڵ 40 كەس و لە هەڵەبجە 14 كەس و لەهەولێر 12 كەس و لە سلێمانیش 10 كەس،لە شاری كەركوكیش 94 كەس بەهۆی خۆڵبارینەوە رەوانەی نەخۆشخانە كراون.