وەزیری دەرەوەی ئەمریکا لەبەردەم کۆنگرێسی وڵاتەکەی هؤشداری دەداتە عێراق لەسەر هەرێمی کوردستان

مارکۆ ڕۆبیۆ، وەزیری دەرەوەی ئەمریکا، کە هاوکات ڕاوێژکاری ئاسایشی کۆشکی سپییە لە کۆنگرێسی ئەمریکا قسەی کرد و هەڕەشەی لە عێراق کرد بەوەی دەبێت ئۆتۆنۆمی کوردستان و مافەکانی بپارێزێت.

لە کۆنگرێس لەلایەن لیژنەی پەیوەندییەکانی دەرەوە پرسیار لە مارکۆ ڕۆبیۆ کرا لەبارەی هەرێمی کوردستان و ئەو دوو گرێبەستەی دوو کۆمپانیا ئەمریکیەکە لەگەڵ کوردستان ئیمزایان کردوون بە بەهای 110 ملیار دۆلار، کە عێراق ناڕازییە.

مارکۆ ڕۆبیۆ، وەزیری دەرەوەی ئەمریکا ڕایگەیاند، ئێمە بەڕوونی بە حکومەتی عێراقمان وتووە، ئەگەر دەیەوێت پەیوەندییەکی باشی هەبێت لەگەڵ ئیدارەی ئەمریکا، دەبێت سێ شتی سەرەکی بکات:

یەکەم: پاراستنی ئۆتۆنۆمی کوردستان و مافەکانی، وە ڕێگەنەگرتن لە هیچ گەشەیەکی ئابووری و خۆشگوزەرانی هەرێمی کوردستان.

دووەم: پاراستنی مافی کۆمپانیا ئەمریکییەکان و وەبەرهێنەرانی ئەمریکا لە عێراق.

سێیەم: کەمکردنەوەی کاریگەری میلیشیا شیعەکانی سەر بە ئێران لەناو حکومەت و سێکتەرە جیاوازەکان، چونکە ئاگادارین چ کاریگەرییەکیان هەیە، ئەمە قابیلی قبووڵ نییە و دەبێت وەڵام بدرێتەوە.
وەزیری دەرەوەی ئەمریکا جەختیشی کردەوە، بەغدا دەبێت بزانێت سیاسیەتی سەرەکی ئەمریکا لە عێراق بریتییە لە پاراستنی بەرژەوەندییەکانی ئەمریکا و نەهێشتنی هیچ ڕێگرییەک بۆ بەرەوپێشچوونەکانی ئەمریکا.