هەڵوەشاندنەوەی پەرلەمانی كوردستان گەیشتە سەر مێزی دادگای فیدڕاڵی

دادگای فیدراڵی وردبینی بۆ دوو سکاڵا دەکات کە لەلایەن نەوەی نوێ و کۆمەڵی دادگەرییەوە دژی سەرۆکی هەرێمی کوردستان تۆمارکراون و داوای هەڵوەشاندنەوەی پەرلەمانی کوردستانیان کردووە.
 بەپێی خشتەی دانیشتنەکانی دادگای فیدراڵی عێراق، 6ـی تەمووز دادگاکە وردبینی بۆ دوو سکاڵا دەکات کە بۆ هەڵوەشاندنەوەی خولی شەشەمی پەرلەمانی کوردستان تۆمارکراون.
دوو سکاڵاکە لەلایەن سروە عەبدولواحید، کاوە عەبدولقادر و کوردەوان جەمال لە فراکسیۆنی نەوەی نوێ لە پەرلەمانی عێراق و کوردستان و عومەر گوڵپی کاندیدی سەرکەوتووی کۆمەڵەی دادگەری بۆ پەرلەمانی کوردستان تۆمارکراون.
نەوەی نوێ لە سکاڵاکەیەدا کە دژی سەرۆکی هەرێمی کوردستان تۆمارییان کردووە، داوایان لە دادگاکە کردووە، بەهۆی هەڵنەبژاردنی دەستەی سەرۆکایەتی پەرلەمان و متمانە نەدان بە ئەنجومەنی وەزیران داوای هەڵوەشاندنەوەی خولی شەشەمی پەرلەمانی کوردستانیان کردووە.
ماوەیەک لە مەوبەر شاسوار عەبدولواحید، سەرۆکی جوڵانەوەی نەوەی نوێ وتی، ئەگەر لە ماوەی دوو هەفتە حکومەت پێکنەهێنرێت، کار بۆ هەڵوەشاندنەوەی پەرلەمانی کوردستان دەکەن، لە کاردانەوەی ئەوەدا زۆرێک لە بەرپرسانی پارتی و یەکێتی بابەتەکەیان بە جدی وەرنەگرت و بە تەنزەوە قسەیان لەسەر دەکرد.