ژووری نوستنی بەرپرسە باڵاکانی ئێران دەبێتە شوێنی مردنیان

شەڕی نێوان ئیسرائیل و ئێران سەختتر دەبێت و هەردولا بە چڕی موشەکبارانی یەکتر دەکەن و دەست لە هیچ شتێک ناپارێزن، ئەوەی جیاوازە، ئێران بینا و باڵەخانەکانی ئیسرائیل دەپێکێت، بەڵام ئیسرائیل بەرپرسە باڵاکان و زانا ئەتۆمییەکان و کۆگای چەک و دامەزراوە ئەتۆمییەکان دەپێکێت..
لە سەرەتای دەستپێکردنی هێرشەکانی ئیسرائیلەوە، چەندین بەرپرسی باڵای سەربازی ئێران و کەسی یەکەمی دامەزراوە سەربازییەکان کوژراون، هەر ئەوەندەش نا، تەنانەت بەشێکیان جێگرەوەکانیشیان کوژراون، ئەوەی سەیرە بەشێکی ئەو بەرپرسە باڵایانە لە ژووری نوستنەکانیان کوژراون، ئەو ژوورەی کە شوێنی حەوانە و چێژبینیان بووە، ئێستا لێیان بووە بە دۆزەخ و شوێنی رۆح کێشانیان، تەنانەت ژووری نوستنەکەی عەلی خامنەییش مەترسیدارە و هیچ پارێزراو نییە..
هەر لەو نێوەندەدا کەناڵی سی بی ئێس لەزاری بەرپرسێکی ئیسرائیلییەوە رایگەیاندووە، ئیسرائیل پێیوایە عەلی خامنەیی ڕێبەری کۆماری ئیسلامی ئێران نابێت "بە ئاسوودەیی بژی"و ئامۆژگاری دەکات کە "شەوانە ژووری نوستنەکەی بگۆڕێت".

ئەو بەرپرسە جەخت لەوە دەکات کە ئیسرائیل بەشێوەیەکی تایبەت سەرکردە سیاسییەکان تیرۆر ناکات، بەڵکو زیاتر سەرنجی لەسەر کایەی ئەتۆمی‌و سەربازییەو ڕێبەری باڵای کۆماری ئیسلامیی ئێرانیش لەبڕیاردەرانی ئەم دوو بوارەیە، بۆیە پێویستە ڕێبەر شەوانە ژووری نوستنەکەی بگۆڕێت بۆ ئەوەی پارێزراو بێت..