پێشمەرگە كوژراوەكە 25 فلس لە گیرفانیدا بوو

" لە یەكێك لە شەڕەكانی براكوژی نێوان پارتی و یەكێتیدا لە شاخ، پێشمەرگەیەكی یەكێتی و پێشمەرگەیەكی پارتی دەكوژرێن، پاش ئەوەی كە گیرفانیان دەگەڕێن، پێشمەرگەكەی یەكێتی 25 فلس لە گیرفانیدا بووەو پێشمەرگە كوژراوەكەی پارتیش 200 تمەنی لە گیرفاندا بووە".
نەوشیروان مستەفا لە یەكێك لە كتێبەكانیدا، ئەم دیمەنە دەگێڕێتەوە.

 من " هاڤە دارا"م لە دەلاقەی بەرنامەی " دادگای مێژوو"ی دیبلۆماتیكەوە، لە زاری خودی شۆڕشگێڕەكان و كارەكتەرەكانی ناو شۆڕشەكەوە بە چیرۆك و دیوە تاریكەكانی ناو شۆڕشی كوردی ئاشناتان دەكەم، لە گۆشەی ئەمجارەشەوە دیمەنی تراژیدیی شەڕی ناوخۆی نێوان پارتی و یەكێتیان لە سەردەمی شاخدا بۆ دەگێڕمەوە. 

ئەوان پارتی و یەكێتی لەسەر دەمی خەباتی شاخ و تا بەر لە ڕاپەڕینی بەهاری 1991 و هاتنەخوارەوەیان بۆ ناو شارەكان، قۆناغێكی سەختی شەڕی براكوژییان بەڕێوە بردو لە چەندین گەڕی شەڕی نێوانیاندا لە شاخ و گوندو دەشت و دۆڵەكانی كوردستاندا، سەدان كەسیان لەیەكتر كووشت.

لە لاپەڕە ۳۱۹ی كتێبی " پەنجەكان یەكتری ئەشكێنن"دا، نەوشیروان مستەفا باس لە دیمەنێكی تراژیدی شەڕی ناوخۆی نێوان پارتی و یەكێتی لەسەردەمی خەباتی شاخدا دەكات و دەڵێت:" دوای كوژرانیان لە شەڕێكی بەرانبەر یەكتردا، گیرفانی پێشمەرگەیەكی یەكێتی ۲٥ فلسی تێدابووەو گیرفانی پێشمەرگەیەكی پارتیش ۲۰۰ تمەنی تێدا بووە".

نەوشیروان مستەفا لەو كتێبەیدا كە ڕووداوەكانی ساڵی 1979 تا 1983ی تێدا تۆمار كردووە، دەڵێت:" یەكێك لەو دیمەنانەی هەرگیز لەبیرم ناچێتەوە، لەكاتی سەركەوتندا پێشمەرگەیەكی تیپی سەفین ناوی فاروق بوو، بەسەختی برینداربوو، لە بن دارەكەدا دانیشتبوو، خوێن لە برینەكەی سنگی ئەچۆڕا، دوای مردنی كە گیرفانی گەڕابوون، 25 فلس لە گیرفانیدا بوو، كە سەركەوتم بۆ شەڕگەو لاشەی كوژراوێكی " پارتی"یان نیشاندام، 200 تمەن لەگیرفانیدا بوو، لەدڵی خۆمدا بەزەییم بەخۆم و بە گیانبازەكانی گەلەكەمدا هاتەوە، كە لەم شاخە بەرزەدا لەسەرچی شەڕ دەكەن".

ئەو شەڕەی نێوان پارتی و یەكێتی كە نەوشیروان مستەفا باسیدەكات، ساڵی ۱۹٨۳ بووەو لەو كاتەدا ۲٥ فلسەكەی گیرفانی پێشمەرگەكەی یەكێتی بسكیتێكی بچووك یان دوو جگەرەی كردووەو ۲۰۰ تمەنەكەی گیرفانی پێشمەرگەكەی پارتیش بەهاكەی بەرانبەربووە بە سێ دینارو نیو. 

سۆزانی حەمە تاتە، لە كتێبی " تراژیدیای خێزانێكی شۆڕشگێڕ"دا، لە زاری مامۆستا " ئارام باساك" كە لە ساڵانی هەشتاكاندا پێشمەرگەی یەكێتی بووە، باس لە بێزاری گوند نشینەكان، بەرانبەر شەڕی ناوخۆی نێوان پارتی و یەكێتی لەسەردەمی خەباتی شاخدا دەكات و دەڵێت:" لە گوندی چنگیان، لە ماڵی مامە حاجی رەشید لامدا، پیاوێكی بەڕێز بوو، پێشمەرگەی هەموو لایەنەكان خۆشیان دەویست ئەویش جنێوی بە هەموو لایەنەكان دەدا، لەو كەمە دانیشتنە كە لەلای بووم، وتی:" ئا ئەمە وەزعە دروستانكردوە، دەك هەرچی نانێك پێتان دەدەین بە ژەهری مارتان بێت، ئەی گوو بەو كوردستانەی ئێوە بۆمان رزگار دەكەن، ئەم وڵاتەتان سوور كرد بە خوێنی یەكتری، كەچی هیچتان بەرامبەر دوژمن نەكرد، شەڕە سەگی وام لە هیچ وڵاتێكدا نەدیوە، هەر گەماڵە و گەماڵێكی دیكە لە خوێندا دەگەوزێنێت. سەركردایەتییەكانتان هەموویان وەك شەیتان وان و ئێوە دوای شەیتانەكان كەوتوون".

سۆزانی حەمە تاتە، لە زاری پێشمەرگە دێرینەكەی یەكێتییەوە، دیمەنێكی دیكەی بێزاریی، خەڵكی گوندەكان بەرانبەر شەڕی ناوخۆی نێوان پارتی و یەكێتی دەگێڕێتەوەو دەڵێت:" لە گوندی " نۆدێ" لامدایە ماڵێك، ژنی خاوەن ماڵەكە وتی، تاكەی ئەم شەڕی براكوژییە دەكەن، سەركردایەتییەكانتان لە سەرەوە بێخەم دانیشتوون و كچ و كوڕەكانیان لە هەندەرانن و ئێوەشیان لەیەكدی بەرداوە، ئەم شەڕە بۆ كێ دەكەن؟ بۆ ئازادیی ئێمە! حاشا بێت لەو ئازادییە و ئێمە نامانەوێت".