بە ئامانجگرتنی وەفدەكەی حەماس لەلایەن ئیسرائیلەوە،تەڵەی ئەمریكا بوو؟

ئیسرائیل لە ناوەراستی دەوحە كۆبونەوەیەكی سەركردە باڵاكانی حەماسی كردە ئامانج،لەكاتێكدا لە كۆبونەوەدا بوون بۆ تاوتوێكردنی پێشنیارێكی دۆناڵد ترەمپ بۆ ئاگربەست لە غەزە.

كەناڵی 11 ی ئیسرائیل دەڵێت هێرشەكەی ئیسرائیل بۆسەر كۆبونەوەی سەركردە باڵاكانی حەماس لە دەوحە بە هەماهەنگی و لەسەر بنەمای زانیاریەكانی ئەمریكا بووە.

چاودێران دەڵێن بانگهێشتكردنی سەركردەكانی حەماس لەلایەن دۆناڵد ترەمپەوە بەناوی تاوتوێكردنی پێشنیارێكی ئەمریكی بۆ ئاگربەست هەر لەبنەرەتەوە تەڵەیەك بووە بۆ كۆكردنەوەی سەرانی حەماس لە جێگایەك و كوشتنیان پێكەوە.

لە كۆبونەوەكەدا لانی كەم 5 سەركردەی حەماس بونیان هەبووە لەوانە خالید مشعەل،خەلیل ئەبو حەیە و زەهرا جبارین.

هەرچەندە لە سەرەتاوە میدیاكانی ئیسرائیل هەواڵی كوژرانی سەرجەم سەركردەكانی حەماسیان بڵاوكردەوە،بەڵام میدیای قەتەری دەڵێن:ئەندامانی وەفدی دانوستانكاری حەماس سەلامەتن و لە هەوڵی تیرۆركردنەكە رزگاریان بووە.