دیبلۆماتیك

لێدوانێكی ڕەجەب تەیب ئەردۆگان، سەرۆككۆماری توركیا دژ بە ئیسرائیل، ئاگر لە ململانێكانی نێوان ئەو دوو وڵاتە بەر دەدات كە لە دەمی هەڵگیرسانی جەنگی غەززەوە لەسەر ئاستی ڕاگەیاندن لە نێوانیاندا بەرپابووە.
 دوێنێ، ڕۆژی یەكشەممە، 28ـی تەمووز، ڕەجەب تەیب ئەردۆگان، سەرۆككۆماری توركیا، هەڕەشەی دەستێوەردانی سەربازی بەرانبەر ئیسرائیل ڕاگەیاندو باسیلەوەكرد هەروەك چۆن لە " لیبیاو ناگۆرنۆ كاراباخ" دەستێوەردانیان كردووە، ئاواش دەتوانن لەشەڕی ئیسرائیل‌و فەلەستینییەكاندا دەستێوەردان بكەن.
ئەردۆگان لە كۆبوونەوەیەكی جەماوەری پارتەكەی، " پارتی دادو گەشەپێدان"دا لە شاری " ریزە"ی توركیاوە وتی:" هەروەكچۆن چووینە نێو " قەرەباخ و لیبیا"و دەستێوەردانی سەربازیمان كرد، بەهەمانجۆر دەتوانین دژی ئیسرائیل دەستێوەردانی سەربازی ئەنجامبدەین‌وهیچ هۆكارێك‌و هیچ بەربەستێكیش نییە كە نەتوانین هێز بنێرینە ناو خاكی ئیسرائیلەوە".
ئەردۆگان لە میانی هێرشەكانی بۆسەر ئیسرائیلدا وتیشی" ئێمە تەنیا دەبێت  بەهێز بین بۆ ئەوەی ئەو هەنگاوانە بهاوێژین. ئێمە ئەمڕۆ هەموو قسەیەك دژی ئیسرائیل دەكەین‌و لەگەڵ ئەواندا هەموو جۆرە بازرگانییەكمان راگرتووەو پەیوەندییەكانیشمان پچڕاندووە، پێوویستە توركیا دەسەڵاتی خۆی بەهێز بكات بۆ ئەوەی ئیسرائیل كردەوەكانی دژی فەلەستینییەكان ڕابگرێت".
دوای چەند كاتژمێرێك لە هەڕەشەو هێرشەكانی ئەردۆگان بۆ سەر ئیسرائیل، وەزیری دەرەوەی ئیسرائیل، وەڵامی سەرۆككۆماری توركیای دایەوەو وتی:" ئەردۆگان لەسەر هەمان ڕێگەی سەددام حسێن دەڕوات‌و شوێنپێیی سەدامی هەڵگرتووە".
" یسرائیل كاتس"، وەزیری دەرەوەی ئیسرائیل لە وەڵامی هەڕەشەكانی رەجەب تەیب ئەردۆگاندا بۆسەر وڵاتەكەی،لە پلاتفۆرمی " ئێكس"وە لەگەڵ دانانی وێنەیەكی سەددام‌و ئەردۆگاندا، وەڵامی ئەوی دایەوەو وتی:" ئەردۆغان لەسەر هەمان رێگای سەدام حسێن دەڕوات‌و هەڕەشەی هێرشكردنە سەر ئیسرائیل دەكات، تەنها با بیری بكەوێتەوە كە لە عێراق چی ڕوویداو چۆن كۆتایی بە سەددام حسێن هات".
 
 
بەرەبەیانی ئەمڕۆ دووشەممە، وەزارەتی دەرەوەی توركیا لە بەیاننامەیەكدا، وەڵامی هێرشەكانی وەزیری دەرەوەی ئیسرائیلی دایەوەو ڕایگەیاند:" كۆتایی بنیامین ناتانیاهۆ، سەرۆكوەزیرانی ئیسرائیل كە ئەنجامدەری كۆمەڵكوژییە لە كەرتی غەززە، وەك كۆتایی ڕێبەری نازیییەكان "هیتلەر" وایە كە ئەویش جینۆسایدی ئەنجامدا".