لەو کاتەوە مۆنتسکیوی فەیلەسوف پرەنسپی دابەشکردنی دەسەڵاتی هێنایە ناو گوتاری سیاسییەوە، دواتر لە دەستوری بنەڕەتی سیستەمە دیموکراتەکاندا وەک بنەمای دیموکراتی جێگیرکرا، دەسەڵاتی سیاسی لەنێوان یاسادانان و بەڕێوەبەری و دادوەریدا دابەشکرا، دواتر لە سەردەمی پێشکەوتنە خێراکاندا و نوێگەری و دیموکراتیدا دەسەڵاتی میدیا وەک دەسەڵاتی چوارەم، وەک یەکێک لە بنەماکانی دیموکراتی هاتە نێو گوتاری سیاسییەوە وەک هێزێکی کاریگەرو بەرگریکاری خەڵک چاودێری دەسەڵاتەکانی دیکە دەکات، لە هەرکوێ نادادپەروەری و گەندەڵی هەبێ زەقی دەکاتەوە و کار بۆ چارەسەرکردنی دەکات. ئێستا میدیا ئەوەندە کاریگەرە بووەتە بەشێک لە هەر تاکێک، بەڵام لەڕاستیدا بەشێک لە میدیای ئەمڕۆ نابەرپرس و شەڕانگێزن ئەوەش دەگەڕێتەوە بۆ سیاسەتی ئەو هێزانەی لە پشت هەر میدیایەکەوەن، ئێستا جۆرێک میدیا دروستبووە دەکرێ بە میدیای شەڕانگێزو سەفەری بیناسێنین. میدیای سەفەری و شەڕانگێز ئەو جۆرەیە لە میدیا، کە ئەمڕۆ حزبێک، گروپێک کۆمپانیایەک، عەشیرەتێک، گەڕەکێک، بۆ ماوەیەکی کاتی دروستی دەکەن لە ڕێگای هەندێ قەڵەمی قەزەم و بێ مۆراڵەوە خەڵکی دیکەی یان ڕکەبەرەکانیانی پێ دەشکێنن و ڕەسەنایەتی و بەرپرسیاریەتی میدیاش دەخەنە ژێر پرسیارەوە، ئەم جۆرە میدیایە وەک کاڵا بۆ ماوەیەکی کاتی بەکاردەهێنرێن و هەتا ئەو کاتەی کاریان پێیان نامێنێ ئیتر دەمیان قەپات دەکەن. 

ئەم میدیانە بێ دایک و باوک و زۆڵن، بەڵام بەجینات دەناسرێنەوە لە کێن ولەکوێوە سەرچاوەیان گرتوە بەڵام خاوەنەکانیان دەرک بەوە ناکەن، ئەگەرچی لە کورت ماوەدا خەڵکی پێ دەشکێنن، 

بەڵام لە بۆ دوور مەودا خاوەنەکەشی باجی دەدات، چونکە لەلایەکەوە دەستەکەیان کەشف دەبێ لەلایەکی دیکەوە ئەم جۆرە لە میدیا ڕۆحی کۆمەڵگە توشی نامۆبوون و داڕزان و بێ ئیرادەیی دەکات دواجار باجەکەی میللەت و نیشتیمان دەیدەن خاوەنەکانیشیان مایە پووچ ،ئەوەیە چارەنوسی میدیای شەڕەنگێزو و سەفەری .