پارتی بڕیاریدا بەشداری هەڵبژاردن نەکات و لیستی کاندیدەکانی پێشکەش نەکرد، ئەمەش دەرخەری ئەوە بوو کە پارتی جدیە لە پرسی بەشداری نەکردنی هەڵبژاردن لە ١٠ی٦ی٢٠٢٤دا، 

پارتی بۆ ئەنجامنەدانی هەڵبژاردن ڕێگای بەغدادی گرتەبەر و لەگەڵ دۆستەکانیدا کۆبویەوە، هەرچەند دۆستەکانی لە بەغداد بەدەمیانەوە هاتن، بەتایبەت نوری مالکی کە نوێنەرایەتی ئیتاری تەنسیقی دەکات، نوری مالکی هەر لە سەرەتاوە بەڵێنی بە پارتی دابوو کە لە پرسی دواخستنی هەڵبژاردندا هاوکاریان دەبێت و ئەو پرسە لە عێراقدا لێگەرێن بۆ ئەو!

بەڵام ئەمە کافی نیە و دڵنیایی نەدایە پارتی بۆ دواخستنی هەڵبژاردن چونکە ئەوەی بڕیاری ئیتار و دادگای فیدراڵی و حکومەتیشی بەدەستە لە دەرەوەی بەغدادە، بۆیە لە دوای بەغداد پارتی ڕووی کردە تاران،  

ڕاستە سەردانی نێچیرڤان بارزانی سەردانێکی پرۆتۆکۆڵی بوو لەسەر ئاستی هەرێم، بەڵام ئەم سەردانە دوای تەواوبونی گفتووگۆ و ڕێککەوتنی پێشتری تەواوەتی پارتی بوو لەگەڵ تاران هەرچەند نێچیرڤان بارزانی دەیخواست دواخستنی هەڵبژاردن بکەوێتە پێش سەردانەکەی بۆ تاران بەڵام نەکرا،  نزیکبونەوەی پارتی و ئێران بە جۆرێکە کە لە بیست ساڵی ڕابردوودا پارتی بەوشێوازە ورد و گشتگیرە نەچوەتە نێو گفتوگۆ و ڕێککەوتنەوە لەگەڵ تاران،  بۆیە سەردانی نێچیرڤان بارزانی جگە لە یەك کۆبونەوە هیچ کۆبونەوەیەکیتری لەدەرەوەی پرۆتۆکۆڵ نەبوە هەر بۆیە جێگرەکانیشی لەگەڵ خۆی بردبوو چونکە پیش سەردانەکە تەواوی پەیوەندیەکان ئاسایی بونەتەوە و گەشتونەتە رێککەوتن.

پرسی هەڵبژاردن بۆ پارتی بوە کلیلی کردنەوەی گرێیەک کە دەمێکە بۆی ناکرێتەوە ئەویش دروستبونەوەی متمانەیە لەگەڵ تاران و کردنەوەی ئەم گرێیەش کاریگەری لەسەر تەواوی بڕیار و سیاسەتی بەغداد دەبێت لەگەڵ پارتی 

ئێران و یەکێتی

یەکێتی وەك دۆستی یەکلابویەوەی تاران لە سنوری خۆیدا لە کوێی ئەم رێککەوتنەدایە؟

ئێرانیەکان بەجۆرێك یەکێتی یان دڵنیاکردۆتەوە کە رێککەوتنیان لەگەل پارتی لەسەر حسابی یەکێتی نیە، بۆیە زۆر بەتەنگ ئەوەوە نەبوون کە کاردانەوەی یەکێتی چی دەبێت، چونکە نێچیرڤان بارزانی چۆن چوەیە بەغداد و جۆرێك دڵنیایی لە هێزە شیعیەکان وەرگرتوە، پێموایە ئاواش لەگەڵ قوباد تاڵەبانی و کورانی کۆسرەت ڕەسول قسەیان کردوە و بەجۆرێك دڵنیاییان وەرگرتوە لەسەر دواخستنی هەلبژاردنەکان و کاردانەوەیان
 
سەبارەت بە بەشێك لە حیزبەکانی تریش، هەر ئەوەندەی نێچیرڤان بارزانی ئاماژە بەوە بدات کە خەرجی بانگەشەی هەڵبژاردنیان بۆ داهاتوو دەگرێتە ئەستۆ ئیتر گرفتیان لەگەڵ دواخستن یان ئەنجامدانی هەڵبژاردندا نیە؟!

ئەوەی ماوەتەوە ئەوەیە بڵێن ئەوەی دەیزانین ئەوەیە کە پارتی دواخستنی هەڵبژاردن و  قۆناغێکی نوێی دۆستایەتی لەگەڵ ئێران و نەرمی دادگای فیدراڵی و هەندێك وردە دەستکەوتیتری بەدەستهێنا، ئەوەشی ناڕوونە ئەوەیە کە پارتی چی داوە تا ئەمانەی بەدەست هێناوە؟
چونکە  ناوی خودی دانوستاند لە دان +ستاندنەوە هاتوە، ستاندنەکەمان زانی و دانەکەش بۆ بابەتێکیتر، هەرچەند وێنەکە کەمێك ڵێڵە.