دە ساڵێک بەر لەئێستا جەنگیزچاندار، لەم نزیکانەشدا مەزڵوم عەبدی، یەک پەیامیان هەبوو بەڵام بەدوو دەربڕینی جیاواز کە لەعەقڵیەتی دەسەڵاتدارانی تورکیا، جارێکی دیکە ڕێگەنادەن ئەزموونی باشوور، لە ڕۆژئاوا بێت بە ئەمری واقیع و ئەوە باشوور کە هەیە بۆ ئەوانە حەسرەتێکە بەردەوام پێوەی ئەتلێنەوە(سەیری کاردانەوەی ئەردۆغان بکە بەرانبەر ئەنجامدانی ڕیفراندۆم) بە دەیان ڕێگای جیاواز لەشەرێ تایبەتەوە، درۆن و جاسوسەکان، قوتابخانە و  میدیا و  ڕێنمایی ئامۆژگاری و ئەمری خراپ بۆ حوکمڕانی باشوور، کردنی ئەم هەرێمە بە زبڵی کاڵاو ماددە خۆراکیە خراپەکانی، سەرگەرمکردن و خەریککردنی ئینسانی کورد، بەڕۆتینات، مەسرەفگەرایی و روکەشپەرستی، وەرگەرانی مرۆڤە بۆ مرۆڤێکی بەرخۆر، بۆ ئەوەی بیر لە پرسە گرنگە ژیانی و ژیارییەکان نەکاتەوە.

پرسی ئاشتی و پێکەوە ژیان، ماف و ئازادی کورد، لە باکور، بەدریژای ئەو چەند جارەی هاتەوە ئاراوە لە ئۆزالەوە تا ئەرۆغان، پرسێکی تاکتیکی و خافڵگرکردنبووە، پرسی ئاشتی درۆزنانەش  جۆرێک بووە لە شەڕی تایبەت و لەقۆناغێکدا ئەردۆغان، هەست و سۆزی دەنگدەری کوردی بۆ هەڵبژاردنەکان بەدەست هینا، لەئیستاش لەرێگەی ئەم پرسەوە کە هیچ نادات و هیچ نەخشە ڕیگایەکی روون نیە  پرسی چەکدانانی کورد، بێ ئەوەی هیچ هەنگاوێکی کردەیی هەبێت (لەم کاتەدا کە پرسی ئاشتی هەیە بەحساب، ئاسمانی باشوور و رۆژئاوا پرە لەدرۆن، شەهیدکردنی هاوڵاتی مەدەنی، ویرانکردنی ژێرخانی رۆژئاوا، دانانی قەیوم لە شارەوانییەکانی باکوور، داگیرکردنی زیاتری خاکی باشوور هەیە)لەوەها هەلومەرجێکدا دەتوانین  باس لە چارەسەریی و ئاشتیەکی ڕاستەقینە بکەین؟!.

لەم پەیامەی ئەم ڕۆی بەرێز ئۆجەلاندا، بابەتێک بۆمن جیگای بیرکردنەوەیە بە خویندنەوەی هەلومەرجی زیاتر لە ٢٦ساڵ زیندانی کردنی، دابڕانی لە هەلومەرجی دەرەوە و شەڕێ دەرونی لەگەڵی، هەڵکشانی تەمەنی، سەرچاوەیی زانیارییەکانی کە زۆرینەی میدیایی ئاکپارتیە، دەتوانین ئەو پرسیارە گرنگە بکەین هەمووساتەکانی سەرۆک و ریبەر و سەکردەکانمان ساتەوەختێکی عەقڵانیە، هەموو گوتار و پەیامەکان لە هەموو سیاق و کۆنتێکستیکی مێژوویدا دەبێت وەک حیکمەت و چارەسەری رادیکاڵ و ڕێشەی لێی بڕوانین؟! 

 مادام  مامەڵەی ئێمە لەگەڵ مرۆڤە، گوتار و بیرکردنەوەکان زادەی ژینگەی جیاواز، کاریگەری جیاوازی رووداو کارتیکردنە ناوخۆیی و دەرەکییەکانن دەبێت ئاسایی بێت  بەڕێز ئۆجەلان، بەشێک لە بۆچوون و دونیابنیەکانی ناواقیعی و ناعەقڵانی بن و  توانایی خویندنەوەی واقیعی وەک ئەوەی کەهەیە نەبێت، بە بۆچوونی من ئەم پەیام و داوایە بۆ کۆتایی بە خەباتی چەکداری کەهیچ ئاسۆیەکی چارەسەری دیارنیە خۆکوژییە، لەم بابەتە قوربانیەکە کە کوردە  ددان بەهەڵەی خۆیدا ئەنێت و ئەیەوێت قەرەبووی بکاتەوە، بەڵام جەلادەکە  تەکنیک و تەکتیک و ستراتیژی  وەک خۆیەتی. 

ڕێزێکی گەورەم هەیە بۆ ئەو مێژووە زێڕینەی ئۆجەلانی مەزن بە کوردی رەوایەتی پرسەکەی بەخشیویەتی ئەوە شتێکە بۆ هەموو ئینسانێکی خاوەن کەرامەت و ویژدان زیندوو بەڕێزەوە لەبەرانبەریدا بوەستیت، بەڵام  عەقڵانترین کارێک کە بکریت رایگشتی و قەندیل، رەتی بکەنەوە، ئەبێت بەڕیزەوە ئەو ساتە غەمیگنە لە میژووماندا، لەرۆحماندا بهیڵنەوە کە ئەمرۆ  ئەو ڕێبەرە مەزنە پەیامێکی هەڵەی هەبوو، لەساتەوەختێکی ناعەقڵانیدا، دەبێت قبوڵی بکەن  کە نابێت  هەموو پەیام و گوتارەکان وەک حیکمەت ببنین.