دۆستۆیڤسکی لە ڕۆمانی (یادەوەرییەکانی ژێر زەوی )، کە ڕەئوف بێگەرد کردویەتی بەکوردی پرسیارێک لەخۆی و خەڵک و دەوروبەر دەکات، لە ناو ڕۆمانەکەیدا بە دوای وەڵامەکەیدا دەگەڕێت، دۆستۆیڤسکی پرسیارەکە ئاراستەی مرۆڤ و مرۆڤایەتی دەکات و دەڵێ (ئێمەی مرۆڤ چیمان دەوێ؟)

 ئەمە پرسیارێکی فەلسەفییە بە پلەی ئیمتیاز، لێرەدا نامەوێ قسە لەسەر ئەوە بکەم بزانم دۆستۆیڤسکی وەڵامەکەی چییە و مرۆڤ چۆن سەیر دەکات، چونکە مرۆڤایەتی چەندە وێرانەی بەرهەم هێنابێت زیاتر داهێنانی لە هەموو بوارە سیاسی و زانستی و هونەری و ئەدەبی و بنیادناندا بەرهەم هێناوە. 

گەلانی سەرکەوتوو لەو بوارانەدا دیارن، لێرەدا مەبەستمە ئەم پرسیارەی دۆستۆیڤسکی تەوزیف بکەم بۆ ناو کایەی سیاسی کوردی و حزبی کوردی و بپرسین ئایا حزبی کوردی چی دەوێ؟ ناگەڕێینەوە بۆ دوێنێیەکی دوور و پرسیارەکە بۆ ئێستایە.  وەک دەڵێن (دوێنێ چوو ، سبەی نادیارە ، ئێستا چی) ئەگەر واقیعی جوڵەکانی حزبی کوردی بخوێنینەوە لە کرداردا، لە وەزیفە ڕەسەنەکەی خۆی لای داوە! ئەگەر پێشتر ئامانجی ڕزگاری و ئازادی کورد بووبێت، کورد کە ڕۆڵەکانی لە ناوحزبەکاندا کردە قوربانی بۆ ئامانجێکی بەرز بوو، نەک بۆ ئەم واقیعەی لەسیاسەتخستنەو خودکوژییە.

بەدڵنیاییەوە ئامانجی گەورەو پیرۆز خەونی هاوبەش و گوتاری هاوبەش و کرداری هاوبەشی ستراتیجی دەوێت. ڕەوشی کورد جیاوازە لە هەموو نەتەوەکانی ئەم سەرزەمینە، چونکە دەوڵەتی نیە و کۆڵەوارە لە خودناسی و دوژمن ناسیدا،  لەم کۆڵەوارییەدا حزب ڕۆڵی نەرێنی هەبووە لەوەی نەیتوانیوە تاک دروست بکات بەرمەبنای ئیرادەو باوەڕ بەخۆ بوون. بۆیە ئەگەر سەیری حاڵی حزبی کوردی بکەین لەم پەڕی چەپ بۆ ئەو پەڕی ڕاست بە ئیسلامی و علمانیەوە دابڕانێکی گەورە لە پەیوەندییەکانیاندا هەیە، ئەم دابڕانە لە جیاوازیەوە گۆڕاوە بۆ دوژمنایەتی  یەکدی تا ڕۆ چووەتە پەیوەندی ناوخودی حیزبەکان خۆشیانەوە. ئەم کردارو بیرکردنەوانەی حزبی کوردی فەزایەکی خولقاندووە، کوردی توشی بێ هیوای و سەر لێشێوان کردووە تا ئەو ڕادەیەی کە لە بری ئەوەی بە گوتارێکی هاوبەش گفتوگۆ لەتەک دەرەوەی ماڵی کورددا بکەن. کەچی بەپێچەوانەوە هەرحزبێک بۆ خۆی ولەپێناوبەرژەوەندی خۆی کاردەکات تەجاوزی مەسەلەستراتیجی یەکان وبەرژەوەندیەباڵاکانی کوردو چاکەی گشتی دەکەن ، ئەمەش وایکردووە هەموو جوڵەکانی ئەم قۆناغەی کورد بە مردوی لە دایک ببن .

بۆیە ئەگەر ئێستا پرسیارەکەی دۆستۆیڤیسکی لەحزبەکان بکەیت و پێیان بڵێیت چیتان دەوێ بۆ خۆتان و بۆ کورد؟ بە دڵنیاییەوە وەڵامێکی  لۆژیکی یان پێنیە ئەمەش بەرەو نادیارێکی ترسناکمان دەبات ئەگەرخاڵێکی کۆتایی بۆ دانەنێین.