دەربارەی چاکسازی و گۆڕانکاری دەسەڵاتی هەرێمی کوردستان

ئەو  سەبر و  ئارامەی خەڵکی هەرێمی کوردستان لەگەڵ دەسەڵاتی خۆماڵی گرتوویانە. لە ماوەی سی ساڵ رابردوودا سەبری ئەییوبییە. ئەوەی ئازار بە دڵم دەگەیەنێت رۆژ بەرۆژ بچووکبوونەوەی سفرەی خێزانی ئەم وڵاتەیە، ئەویش نەوەک تەنها سفرەی نان و خواردن بەڵکو سفرەی رۆحی و مەعنەوی و مرۆیی
( ئەوان تەنها نانی خەڵک نابڕن بەڵکو ئازار بە رۆحیان دەگەیەنن) . 

بێگومان گەورەترین بەڵای هەژاری تەنها خاڵیبوونی گیرفان و بچووکبوونەوەی سفرەی خواردن نییە. بەڵکو شکانی رۆح و کەرامەتی مرۆڤە. چونکە بابەتە ئابووری و کۆمەڵایەتی و رۆحی و ئەخلاقییەکان کاریگەرییان لەسەر یەکتر هەیە.

عەیامێکیشە( چەندین ساڵە) بە بێدەنگی و ئارامی بیر لە چاککردنی ئەم سیستەمە دەکەمەوە(بیرکردنەوەی بێدەنگ) لە سەرەتاوە بۆ ئەوە دەچووم کە چاکسازی چارەسەرە. بەڵام دوایی گەیشتمە ئەوەی چاکسازی بۆ سیستەمێکە قابیلی چاککردن بێت. بەڵام ئێستا ئیدی باوەڕم وایە دەبێت بگۆردرێت. گۆرانکاریش دوو رێگەی هەیە، دەزانم کاتێک باسی گۆرانکاری دێتە پێشەوە خێرا زەینی مرۆڤ بۆ شەڕ و شؤڕش و بێسەرو بەری و سووتان دەچێت (رێگەی توندوتیژی ). 
بەڵام لە راستیشدا بەو بیرکردنەوانەی تێیاندا شەو و رۆژم بەسەر برد بۆم دەرکەوتووە ئەم رێگەیە بۆ کۆمەڵگەی ئێمە نە مومکینە و ئەگەر شیمانەیشی هەبێت نەخوازراوە!. بۆ ئەمەش بەڵگەی عەقڵی و مێژوویی زۆرم هەیە کە لەوانەیە لە داهاتوودا لەسەریان بنووسم .
 رێگەی دووەم رێگەی ناتوندوتیژیانەیە بۆ ئەمەش بەڵگەی ژیری و مەعریفی و واقیعی و میژوویی تایبەت بە کۆمەڵگەی خۆمانم هەیە. باوەریشم وایە مرۆڤی حەکیم و بوێر (نەوەک ترسنۆک و سەرەرۆ ) ئەم رێگەیە دەگرێتە بەر. خوا دەزانئیت ئەمەش بەقەد سەرە دەرزییەک بەشی نەفس و خۆنواندنی تێدا نییە ، بەڵکو لە ئازار و غەمی خەڵکەوە دەیڵێم!.
ئەم رێگەیە رێگەی مرۆڤە گەورەکانی وەک پێغەمبەران و پیاوچاکانی وەک شێخ عەبدولقادری گەیلانی و مرۆڤە رۆحییەکانی وەک غاندی و ماندیلا  و مارتین لۆسەرکینگە. دەگێڕنەوە شێخ عەلدولقادر رەحمەتی خوای لێ بێت هەر کات خەلیفە سەرە رۆیی بکردایە ئەویش کە  لە مزگەوتەکەیدا دارێک هەبوو،  رووی دەکردە دارەکە و دەیفەرموو: دارەکە دەتبڕمەوە! . ئیتر خەلیفە بە هێزی جەماوەر و لە پێشتریش هێزی رۆحی شێخ دەترسا  و خۆی دەگۆڕی . بە بۆچوونی من کاتییەتی دەسەڵاتداران بزانن ئەگەر لەو رێگەیان واز نەهێنن دارەکە هەر بە راستی دەبردرێتەوە..