خۆت دوورخەوە لە خەڵکی سلبی ، ئەوانە تەنگوچەڵەمەی هەموو چارەسەرێکیان هەیە .
 ئەنشتاین
گومانی تێدانیە کە هەرێمی کوردستان بەدەست کۆمەڵێک قەیران و گیروگرفدا تێدەپەڕێت ، کە هەمووی دەستکردی خۆیتی ، هەر لە سیاسەتی ئابووری و لێکترازانی نێوماڵ و نەبوونی متمانە بە دەسەڵات و حزبەکان و بێتوانای هەندێک لە بەرپرسان… هتد ، ئەگەر ئیرادەیەکی بوێر هەبێت دەتوانێت ئەو قەیرانانە تێپەڕێنێت ، بەڵام بەداخەوە حەزمان لە گۆڕان نیە و ، دەڵێین مادامەکێ کارەکە دەڕوات و بەڕێوەدەچێت بۆچی لە مەترسی بترسین ؟ بۆیەش لە قەیرانێک دەرنەچووینە دەچینە ناو یەکێکی نوێ !
ناهەقی ئەوانە ناگیرێت کە لەخەمخۆریان بۆ هەرێمی کوردستان نیگەرانن لە ئایندە و ، هاتونەتە ئەو بڕوایەی کە ئەو کەچە عێراق-ە دەست بەسەر هەموو شتێک دادەگرێت و هەرێمی کوردستان لە قاڵب دەدات !! ئێ ئەگەر ئێمە وامالێبێت هانا بۆ دادگای باڵای بەناو فیدڕالی ببەین کە لەلایەن وڵاتێکی دراوسێوە ڕێنمایی دەدرێتێ ، بۆچی گلەیی بکەین ؟ هەر بەڕاست هەرێمی کوردستان وا لاوازە کە هەموو وەرەقەکانی سووتابن و نەتوانێت هیچ بکات ؟! ئەگەر ئێمە نێوماڵی خۆمان ڕێکخستەوە و بایەخ بە ئازادی ڕادەبڕین «نەک فەوزای سوشیالمیدیا » و جێبەجێکردنی قانون و بەهێزکردنی دادوەری و ، لەگەڵیدا تێکەڵی وەرەقە بەهێزەکانی خۆمان لە وەرەقەی نەفت و گاز و ، سامانی ئاو  و کشتوکاڵ و ، پێگەی ستراتیژی و ، سامانی پێکەوەژیانی ئاشتیانەی ئایین و نەتەوەکان بکەین ، ئەوە دەبینە مەشخەڵيکی ڕووناک لە ناوچەکەدا کە کەس ناتوانێت تخونمان کەوێت ، ئەو کێشە و قەیرانانەی کە هەن ئەوها تەنگوچەلەمە نیە ، گرنگ ئەوەیە بەڕێگایەکی شیاو مەمڵەی لەگەڵدا بکەین و بێگەڕانەوە لێدەرچین ، بەداخەوە ئەوەی زیاتر دۆخەکەی لە خەڵک شێواندووە ، هەندێک لە کەسانی داخلەدڵ و نوسەر و ڕۆشنبیر و ڕەوت و بزووتنەوەی پۆپۆلیستیە ، کە هەندێکیان کارەکەیان گەیاندۆتە ئەو ڕادەیەی کە پێیان هیج نیە ڕەنج و خەباتی «100» ساڵەی کورد کۆتایی پێبێت ، ئەمانە دۆخە خەراپەکەیان قۆزتۆتەوە بەروحی تۆڵەسەندنەوە سواری شەپۆڵی ناڕەزایی جەماوەر بوونە و ، دێن بە ووتار و لە سۆشیالمیدیا هونەرایەتی لە دروستکردنی کەشوهەوای بێئومێدی «احباط» دەکەن و ، لەژێر سێبەری نەزانینی زانیاری و ڕۆشنبیری وا لە هاوڵاتی دەکەن کە مەیلێکی گەورەی بۆ دروستبکات بەرەو باوەڕکردن بەهەموو شتێکی خەراپ و سلبی ، لەڕاستیدا سوشیالمیدیا تەحەکوم دەکاتەسەر هەڵوێست و ڕەفتارەکان و بەبڵاوکردنەوەی بەهای سلبی و بێهیوایی واتلێدەکات لە بازنەی دڵەڕاوکێ و گومان و هەستڕاگرتندا بمێنیتەوە و ، ناچارت دەکات نەتوانیت کارلێکەکی ئیجابی لەگەڵ ئەوەی بەسەر ئەو نیشتیمانەدا دێت بکەیت و ، بەمەش مەزاجيکی گشتی لەکن نەوەیەک لە گەنجان خەلق دەکات کە مەیلی بۆ توندووتیژی و تووڕەیی و بیری سلبی بۆ ئینتیما هەبێت ، گەنج دەیەوێت ئەو وڵاتە بۆ جیهانێکی نادیار جێهيڵێت هاتا ئەگەر بخنکێت و نرخی ژیانی خۆی بدات .
ئێمە ئێستا لەهەموو کات زیاتر پێویستیمان بە باوەش بە یەکتریکردن و چاکسازی و لێبوەردەیی و تووڕهەڵدانی ڕقلێبوونەوە هەتا ئەگەر لەسەر هەقیش بین هەیە و ، پێویستیمان بەوە هەیە کە دان بە هەڵەکان بنێن و ، بەسە ئەو گەلە هی ئەوە نیە کە وایلێبکرێت !