هەموو حزبێكی رۆژهەڵاتی، یان رۆژاوایی ، شەرعیەتی قانونی و سیاسی خۆی ، لە كۆنگرەكانییەوە وەردەگرێت !

چوارەمین و پێنجەمین كۆنگرەی یەكێتی،  لە سۆنگەی مەبەستە ناسیاسیە شاردراوەكانی ، دیوی ئەو دیوی كۆنگرەكان، گەردەلوولێكیان نایەوە، رەوتی ئاسایی كۆنگرەكان كەوتە بن پرسیارەوە.

چوارەمین كۆنگرەی یەكێتی ، كە لەناو ناوەندە رۆشنبیریەكان دا ، بە كۆنگرەی ( تاسڵوجە ) ناسراوە ، مامانی راستەقینەی پێنجەمین كۆنگرە بوو ; كۆنگرەی  چاكسازی و هەڵسانەوە و خۆنوێكردنەوە نەبوو ، هەروەكو لە راگەیاندن و تۆڕەكۆمەڵایەتیەكانی ئەوانەوە ، دەهۆڵی بۆ دەكوترا . بۆنەیەك بوو ، بۆ تێپەڕاندنی پرۆسەی دەسەڵات رادەستكردن ، لە حزبەوە بۆ دەزگایەكی هەواڵگری یەكێتی !
لە سەركردایەتیەكی ئیفلیج ، ناكارا و ویستلێزەتكراوەوە بۆ دەست دەزگایەكی هەواڵگری حزبی  . 

كۆنگرەی حزب دەبێ : پێداچوونەوە و هەڵسەنگاندن و شیكاری قۆناخی پێشوو بێت ، بەرنامەدانان بۆ قۆناخی داهاتوو بێت، داڕشتنی ستراتیج و تێڕوانینی كاری سیاسی دیاری بكرێت . بڕگە بە بڕگەی پەیڕەووپرۆگرام و بابەتە چانووسسازەكان ، گفتوگۆیان لەسەر بكرێت  و دەنگیان لەسەر بدرێت .

كۆنگرەی تاسڵوجە ، كۆنگرەیەكی حزبی نەبوو ،( بۆنە)یەك بوو ، پێشتر نەخشەی بۆ كێشرابوو . ئەمەش سێ تایبەتمەندی كۆنگرەكەیە :

١- پەیڕەووپرۆگرام لە ناو بۆنەكەدا دەنگی لەسەر نەدرا .
٢- دیاریكردنی سكرتێری گشتی یان سەرۆك و دەسەڵاتەكانی بۆ پاش كۆنگرە دیزە بە دەرخۆنە كرا .
٣-  هۆڵی كۆنگرە لەبری كادری هەڵبژێردراو بە ( ٤٥٠ ) ئەندامی ” دەزگا ”یەك پڕكرایەوە . ئیدی دەزگایەكی دەوڵەتی بڕیاری دیاریكردنی چارەنووسی حزبێكی كەوتە دەست  . سەركردە و كادرە مێژووییەكان كش مەلكیان لێكرا .

هیوادارم برای بەڕێز شیخ لاهووری شێخ جەنگی ، كە ئێستا لیستی خۆی هەیە ، یان كاك شاڵاوی عەلی عەسكەری یان هەر كاكێكیتر روونكردنەوەوە بدەن و  ئەم زانیاریانە پشت راستبكەنەوە ، یان بە درۆی بخەنەوە !

رۆژی ٨ی تەمووزی ٢٠٢١ ئینجا كاك ئەژی ئەمین كێشەی ” هاوسەرۆكایەتی ” بە بیست دەقیقە ، بە قازانجی كوڕكانی مام جەلال یەكلا كردەوە ! دەسەڵاتی رەهای وەكو هێلكەی پاككراوە خستە بەردەست كوڕەكانی مام جەلال ..!

كۆنگرەی (٥) پار ، كۆپییەكی بێفەڕ و هەڵكڕوزاوی كۆنگرەی ” تاسڵوجە ” بوو : ئەمەش یەك دوو كەسی ناسیاسی ، كە هیچ سەریان لە كاروباری حزبی دەرناچێت  ، بەرنامەیەكی سەقەت و پەقەتیان بۆ كۆنگرە دانا :  تەنیا یەك لیستیان لە پشت دەرگا داخراوەكاندا بە دزییەوە داڕشت ( پۆڕت دەوێت ؟ ئەوە قەتێ ! قەتێشت دەوێت ؟ ئەوە قەتێ ) . ئەمادەبووانی چەپڵەلێدەر ، چاونووقێنەر ،  سەرلەقێنەر و راستینەبینەر تەنیا چەپڵەلێدان و سەماكردن و سەرچۆپییان لەسەر بوو . 

چل و پێنج رۆژیتر ، یەك ساڵی رەبەق بەسەر  كۆنگرە ژمارە (٥) تێدەپەڕێت ، برای بەڕێز شێخ جەعفەری شێخ مستەفا ، بە سەرۆكی ( ئەنجومەنی باڵای سیاسی و بەرژەوەندیەكانی یەكێتی  ) هەڵبژێردراوە . كەچی هێشتا ئەندامانی ئەو ئەنجومەنە ، رەزامەندی لەسەر : پڕۆسەی لە فلتەردان و پاك و پیس كردنی ئەو  (٤٥٠ ) كەسەی خۆیان ناونووس كرووە ، دەرنەچووە  ! گریمان ئەم چوارسەد و پەنجا كەسە بڕیاریان بۆ دەرچوو : كرانە ” گوڵئەندام ” چی لە وەزعی یەكێتی دەگۆڕێت ؟

من وەكو كەسێكی ئەكادیمی هەر ئەوەندەم لە سەرە راستیەكان وەكو خۆی بنووسم . ئەگەر ئەوەی نووسراوە لە راستیەوە دوورە با یەكێك لەوانەی لە من ئاگادارترن راستیەكان وەكو  خۆی بنووسن .

بەگوێرەی پەیڕەووپرۆگرام بێت ; یەكێتی  سۆسیال - دیموكراتە ! ئەمەی لەم  دوو كۆنگرەیەدا روویداوە ، لە ناو ( قانون الاحزاب السياسية / رقم ٣٦ لسنة ٢٠١٥  )جێگەی نابێتەوە . كەسێك لە ( دادگای باڵای فیدرالی  ) داوایەك تۆمار بكات ، كێشەی گەورە بۆ ئەم سەركرایەتیە دروست دەبێت . چونكە بە گوێرەی ئەم قانونە ، ماوەی دووسێ ساڵی رابوردوو ، بەڕوونی دیارە ( كەتن ) و ( پێشیلكردنی یاسایی ) ئەنجام دراوە . با ئەوانە بە ئەندامی سەركردایەتی دامەزرێنراون قانونەكە بەوردی بخوێننەوە.