لە مێژوودا کورد هەمیشە چاوەڕوانی ئەوی دیکەو دەرەوەی ماڵی خۆی بووە کە ببێتە فریادڕەسی، ئەمە حاڵەتێکی ئاساییە کە هێز لەوی دیکە وەرگرێ بۆ بەهێز بوونی کورد، بە مەرجێک ئەوەندە ئامادەکاریت کردبێت کە نەبێتە داشی دەستی ئەو هێزەی کە هێزی لێوەردەگرێ، واقیعی لەخۆت و لەوانی دیکە تێبگەی، لەوێسگەی جیاجیادا کورد بەهۆکاری جیاجیا خەڵەتێنراوە ئیتر هۆکاری ئاینی و ئایدۆلۆجی و خێڵەکی بووبێت، هەردەم لەدەرفەتەکاندا لەبەرهەژاری سیاسی دەوروبەرمان ئێمەیان خەڵەتاندوە مێژووش بەڕوونی ئەمەمان پێ دەڵێ، ئەوانە بوون بەدوێنێ گرنگ ئەوەیە ئێستا هەڵەی دوێنێ دووبارە نەکەینەوە. 

ئێستا جیهان چاوی لەسەر ڕۆژهەڵاتی ناوەڕاستە بەتایبەتی دوای جەنگی ئۆکرانیاو ڕوسیاو جەنگی غەزەو ئیسرائیل و بەر یەککەوتنی لەتەک وڵاتانی ناوچەکە چاوەڕوانی لەدایک بونێکی نوێ دەکرێ کە گۆڕانی سیاسی لەتەک خۆیدا بهێنێت. دەوڵەتانی ناوچەکەش هەستیان بەم جوڵانە کردووە، بۆیە بەهەستیاری مامەڵەی پێشهاتەکان دەکەن ئا لەم کاتەدا دەوڵەتانی خاوەن بەرژەوەندی دۆزی کورد وەک کارتێک دەجوڵێنن هەندێک ئاماژەی کرانەوەو گفتوگۆ لەتەک کورد نیشان دەدات، دەوڵەتی دیکەش هەیە باسی مەزڵومیەتی کورد دەکات ئەم هەڵوێستانە تازە نین بەڵکو لەمێژوودا ڕوویان داوە و دووبارە دەبێتەوە. ئەوەی گرنگە بۆ کورد ئەوەیە توشی وەهم نەبێت و بزانێ چۆن مامەڵە لەتەک پێشهاتەکان و ئاماژەکاندا دەکات دەبێ کورد ئەوە بزانێ کەخۆت نەبویت هیچ کەس ناتوانێت بونت بسەلمێنێ، بۆیە پێویستە ئەحزاب ئەو پرسیارە لەخۆیان بکەن ئایا کامەیە ڕێگا ڕاستەکەیە؟ ڕێگای ڕاست ئەوەیە دانایی و ئەقڵانیەت جێگای دەمارگیری بگرێتەوە ئەو هەموو وزەیەیی دژی یەکدی بەکاری دێنین بیگۆڕین بۆ هەستانەوە و خستنە سەر ڕێگایەکی دروست، ئەم گاڵتەپێکردن و سوکایەتی بەیەکدی بگۆڕین بۆ توڕەبوون لەکردەوە ناشیرینەکانی خۆمان بۆ کرانەوە لەنێوان خۆماندا و بۆ بیرکردنەوەی ستراتیجی بۆ ئەوەی لەم هەلومەرجە تازەدا وەهم دامان نەگرێت و جارێکی دیکە نەمان خەڵەتێنن ئەمەش تەنها بەئەقڵانیەت و یەکگرتویی دەبێت کەخۆت نەبیت نابێ چاوەڕوانی ئەوانی دیکەبیت چی دیکە لە وەهم و ڕق لەیەک بونەوەدا نەژین ئەم جارە باهونەری ئێمە ئەوان تێگەیەنێت کە ئێمەش دەتوانین هێزێکی باشبین لە نەخشەی داهاتودا.