زۆر دڵخۆش دەبم كاتێك کوردێك ، لەهەر چەشنە سێكتەرێكدا ،داهێنانێك ، سەرکەوتنێك، ناوبانگێک لە ئاستی جیهاندا بەدەسبهێنێت، ئیتر لە کایەی زانستی یان ئەدەبی یان وەرزشیدا بێت، بەتایبەتی بۆ میللەتێکی چەوساوە و بێ دەوڵەتی وەکو کورد ، پێم وایە شاکاری گەورەی ئەدەبی دەتوانێ پەیامی ئەم نەتەوەیە لە زیهنی گەلانی دیکەدا جێگیربکات، یاخود ختوکەی ویژدانیان بدات. سەردەمانێك دەنگۆی ئەوە هەبوو کە یەشار کەمال گەورە نووسەری کورد ،خەڵاتی نۆبڵ وەردەگرێت،هەمیشە چاوەڕێم دەکرد تۆ بڵێی ڕێگا بدرێت کوردێک خەڵاتی نۆبڵ وەربگرێت؟! 

بەڵام دواجار کوردبوون نەیهێشت ئەو خەڵاتە وەربگرێت. ئێستا لە سەردەمێکی جیاواز لە سەردەمی یەشار کەمالدا دەژین، ئێستا هەلومەرجی سیاسی و ئابوری و کۆمەڵایەتی و دەرونی و پەیوەندیەکان ،جیاوازتره،وەك  دەڵێن جیهان گوندێکی گەورەیە، بۆیە دەکرێ دەرفەت بۆ کوردێکی داهێنەر هەبێت بۆ وەرگرتنی خەڵاتی نۆبڵ!

بەختیار عەلی ئەو نووسەرەی کوردە ئومێدمان هەبێت، کە بگاتە خەڵاتی نۆبڵ، ئەوەی جێگای دڵخۆشییە ڕۆمانی دواهەمین هەناری دنیای بەختیار عەلی لە ڕیزبەندی باشترین ١٠٠ کتێبی سەدەی بیست و یەک دیاریکرا، ئەگەر باشترین کتێب یان ڕۆمان لەهەر جێگایەکی دیکە دیاریبکرێت ( کەشتی فریشتەکان و بەندەر فەیلی و داگیرکردنی تاریکی و جەمشید خانی مام ) دەتوانن لەو پێشبڕکێیەدا براوەبن، ئاخر ئەمە شانازییە بۆ کوردبوون لە هەلومەرجێکی سیاسی سەختی کورد لە دنیای نەتەوەیەکی بێ دەوڵەتدا ،نووسەرێکی کورد لە ڕیزبەندی باشترین نووسەرەکانی سەدەی بیست و یەکدا بێت ،بەو هیوایەم بەختیار عەلی بگاتە خەڵاتی نۆبڵ کە شانازیيەکی کورد بوونە.