ئەو سەردێڕە قسەی ئەڵمانەکانە و نازانم چەند بۆ ئەم دۆخەی ئێمە گونجاوە، دەبێت دان بەوەدا بنێین ئێمە لە هەلومەرجێکی خراپی سیاسی و ئابووری و کلتوریداین و پەیوەندییەکانی ناو دنیای کوردی گەیشتوەتە ئاستێک، کەس وەرەقەی کەس ناخوێنێتەوەو گۆڕانکارییەکانیش هێندە خێران توانای قسەکردنت نیە لەسەریان.

ترسناکی ئەوەیە کە ئێمە لەو هەلومەرجە نێودەوڵەتی و ئیقلیمیە تێنەگەین، چونکە گەر لەو دۆخ و هەلومەرجە تێنەگەین ناتوانین وەڵامی پرسیارەکانی ئێستاو سبەی بدەینەوەو پێشهاتەکانیش ئەوەمان پێدەڵێن دوای دەستبەکاربوونی ترەمپ گۆڕانکارییەکان خێراتر دەبن، گەر فریا نەکەوین دوور نییە لافاوی گۆڕانکارییەکان کەشتی کوردی بخاتە کەنارێکی نەبینراو، بەتایبەتی دوای تەسفیەی هەندێک فایلی گرنگ لەناوچەکەدا.

بە گەڕانەوە بۆ وتە ئەڵمانیەکە (هیچکات درەنگ نیە) ئێستاش ئەگەر دڵسۆزی و ئەقڵ حزوری هەبێت درەنگ نیە بۆ ئەوەی ئەحزاب کارێک بکەن زەرەر لەنیوەی بگەڕێتەوە. ڕێگا دروستەکە ئەوەیە پەلە بکرێت لە پێکهێنانی کابینەی نوێی حکومەت بە جیهانبینییەک، کە لەتەک ئەم هەلومەرجەدا بگونجێ ئەویش بە چالاککردنەوەی دامەزراوەکان و دواتر ئۆپۆزسیۆن و حکومەت هەر لایەک و ئەرکی خۆی جێبەجێکات نەک تاقێک ئۆپۆزسیۆن و تاقێک دەسەڵات. لێرەوە کار بۆ گەڕانەوەی متمانەی خەڵک بکرێت بە دابینکردنی خواستەکانیان لە هەمانکاتدا ڕێکخستنەوەی پەیوەندیەکانی هەرێم و دەرەوەی هەرێم لە ڕێگای دامەزراوەکانی هەرێمەوە ئەگەر ئەم کارانە بکرێت ئەوا کات درەنگ نیە.