سلێمانی لەبەردەم دووڕیانی (پاشەکشە یان بووژانەوە)دایە؟

ئەلەند مەحوی

لە دوای هەموو ئەو رووداو و قەیرانانەی کە لە (2014 تا 2021) لە هەرێمی کوردستان روویانداوە، پارێزگای سلێمانی و هەڵەبجە ساڵ لە دوای ساڵ زیاتر لە رووی ئابوورییەوە پاشەکشەی کردووە، ئەگەر قەیرانەکان لەسەر شارێکی وەک هەولێر یان دهۆک کاریگەربووبن، لەسەر سلێمانی بەهۆی ململانێی سیاسییەوە دووجار کاریگەربوون.
دواجار لە نیووەی یەکەمی ئەمساڵ بە گشتی لە هەرێمی کوردستان ئومێدێک گەڕایەوە بۆ خەڵک، کاتێک بودجەی 2021 لە پەرلەمانی عێراق پەسەندکراو پشکی کورد دیاری کرا

،،

بازاڕەکان بەرەو بووژانەوە هەنگاویان هەڵبڕی، پڕۆژەکانی وەبەرهێنان دەستیان پێکردەوە، حکومەت لە پڕۆژە تەواونەبووەکاندا دەستی بە جووڵە کردەوە.

بەڵام رووداوە ناوخۆییەکانی یەکێتی کە لە 8ی تەمووز دەستی پێکرد، بارودۆخی سەقامگیری سیاسی و ئابووری سلێمانی دووبارە خستەوە دۆخی چەقبەستوویی، زۆربەی وەبەرهێنەران و بازرگانان کەوتوونەتە دڵەراوکێوە، تەنانەت بەشێکیان هەر سلێمانیان بەجێهێشتووە و چوونەتە دەرەوەی وڵات.
ئێستا پارێزگاکانی سلێمانی و هەڵەبجە و ئیدارەکانی گەرمیان و راپەڕین لەبەردەم دووڕێیانێکی نادیاردان، کە رەنگە ئەوسەری تونێلەکە تەنها کوڕانی تاڵەبانی بە روونی بیبینن.
بافڵ تاڵەبانی و قوباد تاڵەبانی لەبەردەم دەرفەتێکی مێژوویدان، کە دەتوانن وەبەرهێنان لەم دەرفەتەدا بکەن و بیکەن بە سەرمایەیەکی گەورە بۆ یەکێتی نیشتمانی کوردستان و بۆ خۆشیان بە شەخسی

،،

ئەویش بە دەستپێکردنی زەمەنێکی نوێ کە تێیدا ئارامی و جێگیری سیاسی و ئابووری بگەڕێتەوە بۆ سلێمانی و زۆنی سەوز، بە پێچەوانەشەوە ئەگەری بەردەوام بوونی دڵەراوکێکان پاشەکشەی زیاتر بەم زۆنە دەکات.

خەڵکی پارێزگاکانی سلێمانی و هەڵەبجە بە دەستگێڕ و جوتیار و بازرگان و وەبەرهێنەرییەوە بەدوای ئارامیدا دەگەڕێن، دەیانەوێت ماف بگەڕێتەوە بۆ خاوەن ماف و دادپەروەری هەبێت، دەیانەوێت یاسا سەروەربێت و هێزە ئەمنییەکان دەستوەردان لە بازاڕدا نەکەن، دەیانەوێت داهات و خاک و ئاو و هەوای ئەم وڵاتە بۆ هەمووان بێت.
خەڵکی پارێزگاکانی سلێمانی و هەڵەبجە نایانەوێت لە نا ئارامیدا بژین، نایانەوێت هەر رۆژەی یەکێک چاویان لێ سووربکاتەوە و سەرانەیان لێ بسێنێت، نایانەوێت قاچاخچێتی و بازرگانی نایاسایی گیرفانەکانیان بەتاڵ بکاتەوە.
ئاماژەکان ئەوەمان نیشان دەدەن کە هەنگاوەکان بە ئاڕاستەی بوژانەوەی سلێمانی و ئیستقراریەتی سیاسی و ئابووری ئاڕاستەیان گرتووە، لە راستیدا خەڵک ئەنجامی ئەرێنی و واقعی و بەرچەستەی دەوێت، هەر کەس و لایەنێکیش بتوانێت خۆشگوزەرانی دەستەبەر بکات، بە دڵنیاییەوە پێشوازی لێدەکرێت.