ئەوەی لە وێنەکەدا دەیبینن، ئیبراهیم تراوری تەمەن ٣٥ ساڵە، ڕێک ساڵێک پێش ئێستا یەکێک بوو لە ئەفسەرەکانی سوپای بورکینا فاسۆ، بەڵام ئێستا وەک گەنجترین سەرۆکی دنیا ڕابەرایەتی وڵاتەکەی دەکات.

تراوری بەهۆی لێهاتوویی، ئازایەتی و باشییەکەیەوە، گەلەکەی خۆشیدەوێت، بەوە ناسراوە کە بە تەواوی دژی سیاسەتی ئاپارتایت و داگیرکاری ڕۆژئاوایە لە ئەفریکا.

لە دوا لێدوانیدا لەبارەی کودەتا سەربازییەکەی وڵاتی نایجیری دراوسێی، بەڵێنی بە گەلەکەی و تەواوی ئەفریکا داوە، خەبات بکەن بۆ وەدەرنانی داگیرکاری فەڕەنسا و وڵاتانی تری ئەوروپا، لەوبارەیەوە وتویەتی «سەردەمی کۆیلایەتی ئەفریکا بۆ هێزەکانی ڕۆژئاوا بەسەرچوو، ئێستا شەڕی سەربەخۆیی تەواوەتی دەستیپێکردووە، یان نیشتمان یان مردن».

لە تازەترین بڕیاریشدا، هەناردەی یۆرانیۆم بۆ فەڕەنسا و ئەمریکای قەدەغەکرد، چونکە پێیوایە وڵاتانی ڕۆژئاوا لە دژی مرۆڤایەتی بەکاری دەهێنن.

دوای کاردانەوە و هەرەشەکانی فەڕەنساش، تراوری سەرجەم هێزەکانی فەڕەنسای لە وڵاتەکەی دەرکرد.

لەدوای نێڵسن ماندێلا و موعەمەر قەزافییەوە، تاکە سەرۆکی ئەفریکایە، توانیویەتی لەگەڵ چەند وڵاتێکی تری ئەفریکایی هاوپەیمانییەتی سەربازی واژۆ بکات، کە ئەویش هاوپەیمانییەتی (بورکینا فاسۆ، نایجیر، گینیا و مالی)ە بۆ پاراستنی ئەفریکا لە دەستی هێزەکانی ڕۆژئاوا.

ئیبراهیم تراوری بەوە ناسراوە، کە دژی سەرۆکە بە تەمەنەکانی ئەفریکایە، چونکە ئەو پێیوایە خراپی دۆخی ئەفریکا و ژیانی گەلەکەی، بەهۆی سیاسەتی ڕادەستبوونی ئەو سەرۆکانەوەیە کە بوونەتە بەکرێگیراوی وڵاتانی ڕۆژئاوا، لە لێدوانێکیدا وتویەتی «سەرکردە کۆنەکانی ئەفریکا لەپێناو بەرژەوەندی ڕۆژئاوا و خێزانەکانیان شەڕ لە دژی گەلەکەیان دەکەن».

تراوری لە ئێستادا بەهۆی فشارەکانی ئەوروپا و ئەمریکا، لە پۆتن نزیک بووەتەوە، وڵاتانی ڕۆژئاواش لە پروپاگەندە میدیاییەکانیادا بە دیکتاتۆر و دەستکەلای پۆتنی لە قەڵەم دەدەن.