مقتدی صدر بۆ وای کرد

د.ئەمین بەكر

ماوەیەک بوو لەهەندێک ڕاوێژکارو نزیکەکانی مقتدی صدرەوە هەست دەکرا جۆرێک لەپاشەکشەیان لەپێداگیری ئەنجامدانی هەڵبژاردنەکان هەیە لەکاتی خۆیدا، ئەمەش بۆ ئەوە دەگەڕایەوە صدریەکان پێشتر واتێگەیشتبون کەدەتوانن سودی گەورە لەسیستەمی هەڵبژاردنی بازنەی بچوک بکەن بەحوکمی ئەوەی ئەوان هێزێکی نیمچە عقائدی مەرکەزین وبەم شێوەیەش نزیکەی سەد کورسی پەرلەمانی هەڵبژاردنی ئاینده بۆخۆیان دەبەن و دەرئەنجام حکومەتێک بەهاوپەیمانۍ چەند لایەنێکی شیعی وکوردی وسونە بەسەرکردایەتی خۆیان پێک بهێنن.

بەڵام پاش وردەکاری بۆیان دەرکەوتبوو کەژمارەی ڕاستەقینەیان لەنیوەی ئەو پێشبینیەی خۆیانەو، بەو شێوەیەش دۆخیان لەناو خۆیاندا باش نیە کەپێش بینیان دەکرد وڕۆژ بەڕۆژیش دۆخەکە گۆڕانکاری نوێی تێدا ڕودەداو بترەو خراپتر دەچێت ،بەشێکی زۆری خراپی دۆخی خزمەتگوزاریی بەتایبەت خراپی سێکتەری تەندروستی و نەبونی کارەبا وگرانبونی دۆلارو فەشەلی حکومەتیش لەسەر ئەوان ئەژمار دەکرێت بەحوکمی ئەوەی هەریەک لەوەزیری تەندروستی کە لەم دوایانە دەستی لەکارکێشایەوەو وەزیری کارەبا وپارێزگاری بانکی مەرکەزی و ئەمینداری گشتی ئەنجومەنی وەزیران و بەشێکی بەرچاوی بەرپرسانی ئەمنی سەر بەو ڕەوتەن، ئەوەی دۆخەکەی زیاتر تەقاندەوە ڕوداوی نەخۆشخانەی حسينی تایبەت بەکۆرۆنا بوو لەشاری ناصریە کەبوە هۆی گیان لەدەستدانی زیاتر لەسەد کەس لەو ڕوداوەدا و ئەوە دوەمین کارەساتی سوتانی نەخۆشخانەیە کەکارەساتی مرۆیی گەورەی لێ بکەوێتەوە لەم ساڵدا، دواتر خۆپیشاندانی خەڵکی ئەوشارەو بەرزکردنەوەی دروشم دژ بەصدریەکان و زیاتر توڕەبونیان لەمامەڵەی هێزە ئەمنیەکان لەگەڵ خۆپیشاندەران وبەبەڕپرسیار زانینی صدریەکان لەو بەتایبەت لەم دوایانەدا .

بۆیە مقتدی کەوەک سەرکردەیەکی سیاسی بەعەبایەکی ئاینیی وەک مەرجەع وێنادەکرێت بەرگەی ئەو جۆرە سەیرکردن و بەبەرپرسیار زانینەی نەدەگرت،بۆیە ئەوەی مقتدی صدرکردی بۆ هەڵگێڕانەوەی دۆخە سیاسیەکە بوو بەقازانجی خۆی و وەرگرتنی پشویەکی زەمەنی ،بەئامانجی ئەوەی دۆخێکی بۆبڕەخسێ کەبتوانێت هەندێک نمایشی سیاسی تیابکات و لەو ڕێگەیەوە وێنەی خۆی لەچاوی زۆرینەی جەماوەردا ، لە بەرپرسیارو تاوانبارەوە بگۆڕێت بۆ فریاد ڕەس وقوربانی ، وە پێش بینی دەکرێت تاڕادەیەک سەرکەوتوبێت لەوەدا.

ئامانجی صدر لەم دەست کێشانەوەیە لەهەڵبژاردن بەپلەی یەک خۆپیشاندانێتی وەک بەرگری کارێکی خەڵکی ڕەش وڕوت وناڕازیی لەحکومەت وهێزە سیاسیەدەسەڵات دارەکان مادام ئەوان گەندەڵن یان کەمتەرخەمن، وەستان لەبەرەی گەل وخۆ بێ بەری کردن لەبەرپرسیارێتی ، ولەهەمان کاتدا چاوەڕوانی ئەوە دەکات هێزه سیاسیەکانی ترو بەتایبەت هاوپەیمانەکانی وەک پارتی لەکورداو و بەرەی تقدم لەسونە بچنە بەرەکەیەوەو داوای دواخستنی هەڵبژاردنی پێشوەختەی عێراق بکەن وبەم شێوەیەش ئەوەی دەست بکەوێت کەدەیەوێت ، خۆ ئەگەر فشاری ئەمریکیەکان بەئاڕاستەی زەرورەتی ئەنجامدانی هەڵبژاردنی پێش وەختە بوو یاخود ئێران وهێزە نزیکەکانی لەعێراقدا ویستیان سود لەو هەڵوێستە نەرێنێ ی صدر وەربگرن و صدریەکان بکەن بەقسەی خۆیانەوەو ، وسوربن لەسەر ئەنجامدانی هەڵبژاردن لەئۆکتۆبەردا ئەوا پەشیمان بونەوەی صدریەکان ئەگەرێکی چاوەڕوان کراوە ،بەتایبەت ئەگەر پاسیان پێ بدرێت ،چونکە نایانەوێت بەئاسانی دەست بەرداری ئەو هەموو پۆست ودەسەڵاتەبن کەئێستا لەدەوڵەتی قوڵدا بەدەستیان هێناوە، بەتایبەت کە دوو دەورەیە توانیویانە لەشەڕی حزبی دەعوە سەرکەوتوبن و زۆرێک لەکادرو نزیکەکانی ئەو حزبە لەجومگەکانی دەوڵەت دەسەڵات دوربخەنەوەو کادرو کەسانی سەر بە خۆیان لەشوێنیان دابنێن.

خۆئەگەرصدریەکان دەرفەتیەکان بۆگەڕانەوە بۆنەڕەخساو هیچ پاسیەکیان پێ نەدراو هەڵبژادنی پێش وەختەش لەکاتی دیاریکراودا ئەنجام درا ئەوا لەدۆخێکی وادا بونی هێزێکی عقائدی وەک سەدر لەدەرەوەی دەوڵەت، سەرئێشەیەکی گەورە بۆ حکومەت و بەڕێوەبردن ی دەوڵەت دروست دەکەن، دانانی ئاڵای سێ لیواسەربازیەکەی(سەرایای سەلام ،سوپای مهدی ، ولیوای یوم الموعود) سەر بەو ڕەوتە لەپشت خۆیەوە لەکاتی خوێندنەوەی وتارەکەشی جۆرێک لەهەڕەشەبوو ئەو پەیامەی ئەدا کە ئەوان تەنها هێزێکی سیاسی مەدەنی نین و هیچ لایەنێک بیر لەوە نەکاتەوە بێ ئەوان بڕیار لەسەر بابەتە گرنگەکان بدات.