یەكەم نامیلكەی یەكێتی ناوی ( یەكێتی نیشتمانی كوردستان بۆچی؟  ) بوو ، بە عەرەبی ( الإتحاد الوطني الكردستاني لماذا ؟ ) ئەم نووسینەی منیش پاش چل و هەشت ساڵ لە دروستبوونی یەكێتی ناوم لێ ناوە ( یەكێتیی نیشتمانیی كوردستان بەرەو كوێ ؟) چونكە وا هەست دەكەم ،  ئاڕاستەیەك لە ئاڕاستەكانی ئەم حزبە دەیەوێت ئاڕاستەی سیاسی خۆی ، رێڕەوی پێشووی خۆی ، بە شێوەیەك بگۆڕێت ، كە بە بوونی خۆی و بزوتنەوەی نیشتمانیش زیان دەگەێنێت .

یەكێتی لە جەوهەردا ، رێكخستنێكی جەماوەری ، سیاسیە . ساڵی ١٩٧٥ ئامانجێكی سیاسی روونی هەبوو ، درێژەپێدانی شۆڕش و بە هێزكردنی گیانی بەرەنگاری . ئەم رێكخستنە لە سۆنگەی بڕوابوونی بە تاكتیكی خەباتی چەكدار دژی رژێمی بەغدای پێشوو ، پاش نزیكەی ساڵێك لە كاری رێكخستن و پشتبەستن بە  كۆمەڵە و بزوتنەوەی سۆسیالیستی كوردستان ، شۆڕشی هەڵگیرساند  .

كرۆكی بیر و هێڵی سیاسی كۆمەڵە : رێكخستن و كاری سیاسی بوو . مام جەلال هەمیشە نەخشەرێگای سیاسی و هێڵی سیاسی  و پەرەپێدانی كاری سیاسی لەبەر چاو بوو . كاری راگەیاندن و چالاكی ، بڵاوكردنەوە بیروڕای یەكێتی لە كارە پێشینەیەكانی ئەم رێكخراوە بوو .

 هێزی پێشمەرگەش ، بەگشتی ، رۆژانە ، لە رووی بیروباوەڕەوە پەروەردە دەكرا . هەر ئەوەش نهێنی مانەوە و خۆڕاگریی گەلەكەمان بوو .

هێزی چەكداری بێبیروباوەڕ ، دەیان سەركەوتنی كاتیش وەدەستبهێنێت ، چارەنووسی هەر تێكشكان و دۆڕاندن و هەڵوەشانەوە دەبێت ..

 شۆڕشی ئەیلوول ، لە رووی عەسكەرییەوە ، هێزێكی گەورە و تۆكمە و پڕ چەك بوو . بەڵام لە رووی ئایدیۆلۆجی و سیاسییەوە كێشەی قورسی تێكەوت . ئەم هێزە عەسكەرییە مەزنە پاش رێكەوتننامەی جەزایر ١٩٧٥ تووشی هەرەس و نسكۆ هات . پاژێك لە تەشكیلاتی سیاسی پارتی توانی خۆی بگرێتەوە و درێژەی بە كاری سیاسی خۆی بدات و بۆ سەر شانۆ بگەڕێتەوە ..
******************* 
ئەمڕۆ بە چاوی خۆمان ئەوە دەبینین : رێكخراوێكی چەكداری بەهێز و خاون میلیشای باش مەشقپێكراو ، كە تەنیا چارەسەری عەسكەری لە بەرچاو دەگرێت ، چەند زەرەر بە چارەسەری سیاسی دەگەێنێت .
رێكخراوی حەماسی فەلەستینی ( بە نمونە ) ساڵی ٢٠٠٧ لە كەرتی غەزەدا ، هەڵبژاردنی لە رێكخراوی ئازادی فەلەستین ( منظمة تحرير الفلسطينية ) بردەوە . بەرەی چارەسەری سیاسی ، بە ناشیرینترین شێوە سووكایەتی پێكرا و  شاربەدەر كرا . ئەم رێكخراوە بڕوای بە كاری سیاسی و چارەسەری سیاسی و دپلۆماسی و دیمۆكراسی كێشەی فەلەستین كەمتر هەیە . دروشمی سەرەكی ئەو بریتیە لە ( لەناوبردنی دەوڵەتی ئیسرائیل تاقە چارەسەرە ) . رۆژی ٢٠٢٣/١٠/٧ بە هێزترین گورزی لە ئیسرائیل وەشاند و شكۆی باڵادەستی سوپای ئیسرائیلی وێران كرد . پێش حەماس چەندین گروپی وەكو ( أبو نضال ) و ( الجبهة الشعبية لتحرير فلسطين ) بە سەدان كەسیان لە ئیسرائیل كوشت  و چەندین فڕۆكەیان فڕاند و تەقاندەوە ، لە ئەنجام دا ئێستا هەر ناویشیان لەناواندا نەماوە . ئیسرائیل هێشتا لە جێگەی خۆیەتی و بە تەق و تۆق و گرم و هوڕی هەندێ گروپی ناسیاسی هەروا بە ئاسانی لەناونەچێت . 

كاردانەوەی تۆڵەسەندنەوە  ئیسرائیلیش چەند توند و قایم بێت ، بەهەمان شێوە ناتوانێت  حەماس لە رەگ و ریشەوە هەڵبكەنێت ، ئەگەر چارەسەری ئاشتیانەی بۆ كێشەی فەلەستین لەبەر دەست نەبێت .

یەكێتی پاش (٤٨) ساڵ ، ئەگەر بیەوێت شاڕێی كارو خەبات و سروشت و ناسنامەی خۆی بگۆڕێت و ناسنامە و رێباز و هێڵی سیاسی نوێ بۆ خۆی بدۆزێتەوە ، ئەوە ئەو قازەیە فێری رێكردنی پۆڕ و كەو نابێت و رێكردنی خۆیشی بیر دەچێتەوە . تانك تانكە ، پاپۆڕ پاپۆڕە و پاسكیلیش پاسكیلە : پارچەیان بۆ یەكتری نابێت !

نەوەی نوێ جگە لە راگەیاندن و ریكلامی سیاسی یەك لە سەدی مێژووی یەكێتی و پارتی نییە ، كەچی لە هەڵبژاردن دا ، شان لە شانی ئەوان دەدات . هەندێ كاندیدی لە هەڵبژاردنی ٢٠٢١/١٠/١٠ ئەنجومەنی نوێنەرانی عێراق دا ،  شەش بەرانبەری كاندیدی ئەوان دەنگی دوریەوە !

گرەودانان لە سەر پشتگوێ خستنی  بیر و كاری سیاسی ، یەكێتی لە سەركەوتنی سیاسی نزیكتر ناكاتەوە ! كێشەكانی دیوی ناوەوە و دەرەوەی گەورەتر دەكات.