پەیوەندییە کۆمەڵایەتیەکان لە کۆمەڵگەی کوردستانیدا کاریگەری لەسەر پەیوەندی سیاسی و ئابوری هەیە. بەدەمەوە چوونی لەکاتی ناخۆشیەکاندا یاخود نیشاندان و بەشداریکردنی هاوخەمی یەکدی کاریگەری لە خاوکردنەوەی گرژییەکانی نێوان مرۆڤەکان هەیە، بۆیە دەکرێ بەشداریکردن لە پرسە کۆمەڵایەتیەکان تەوزیف کرێ یاخود وەبەرهێنانی تێدا بکرێ بۆ چارەسەری کێشە سیاسیەکان. ئێستا دۆخی سیاسی هەرێم زۆر ناجێگیرە لەناوخۆدا هەم لاوازە بەرامبەر دەوروبەر، ئەم لاوازیەش پەیوەندی بە گرژی نێوان حزبەکانەوە هەیە، کە قسەیان لەتەک یەک نەماوەو کەس گوێ بۆ دەنگی ئەویتر ناگرێت. ئەو گرژییە کوردی گەیاندە ئەم ڕۆژە، ئێستا خەمێکی کۆمەڵایەتی هەیە ئەویش کۆچی دوایی زەکیەخان کچی مستەفا بارزانی و خوشکی کاک مەسعود بارزانییە، لە میدیاکاندا لە ڕێوڕەسمی پرسەکەدا کەسی یەکەمی حزبەکان بۆ هاوخەمی سەردانی جەنابی بارزانییان کرد، لەم هەلومەرجە ناتەباییەی ماڵی کورددا دەکرێ ئەو پرسە کۆمەڵایەتیە دەرگایەک بۆ چارەسەری کێشە سیاسیەکان و پەیوەندی حزبەکان بکاتەوە، ئەو گفتوگۆ کۆمەڵایەتیە بکرێتە گفتوگۆیەکی سیاسی بۆ چارەسەری گرفتەکان. باوەڕم وایە ئەگەر ئیرادە هەبێ کردنەوەی گرێ کوێرەکان ئاسانن.