ئەو بڕیارەى سەرۆکى پەرلەمانى کوردستانى تەنیا کرد

بڕیارێکى رێواز فایەق، سەرۆکى پەرلەمانى کوردستان لەسەر بەدواداچونى پەرلەمانتاران، سەرۆکى پەرلەمان تەنیا دەکات و تەنانەت فراکسیۆنى یەکێتیش نیگەرانن و داواى هەڵوەشاندنەوەى دەکەن.

لەچەند رۆژى رابردوودا، رێواز فایەق، سەرۆکى پەرلەمانى کوردستان بڕیارێکى دەرکرد و داوا لە سەرۆکایەتى ئەنجومەنى وەزیران دەکات رێگا بەهیچ پەرلەمانتارێک نەدرێت بەشێوەى کەسى سەردانى پرۆژەکانى وەبەرهێنان و پرۆژە خزمەتگوزارییەکان بکرێت، بەڵکو دەبێت بەنوسراوى سەرۆکایەتى پەرلەمان یاخود بە بڕیارى لیژنەکان دەبێت بکرێت.

لەکاردانەوەى بڕیارەکەى رێواز فایەق دا، پێشەوا هەورامانى، وتەبێژى فراکسیۆنى پارتى راگەیاندراوێکى بڵاوکردەوە و دەڵێت، ئێمە گۆشکراوى رێبازى بارزانین و بەخۆشحاڵیەوە رایدەگەیەنن کە هیچ پەرلەمانتارێکى پارتى لە کەیسى وەرگرتنى بەرتیل لە وەبەرهێن و بەڵێندەرەکان تێوەنەگلاوە.
وتەبێژەکەى فراکسیۆنى پارتى داواش دەکات لیژنەیەک پێکبهێنرێت، هەرکەسێک پلە و پێگەى خۆى بۆ بەرژەوەندى کەسى بەکارهێناوە ناوى بهێنرێت و رووبەرووى یاسا بکرێتەوە.

ئەوەى جێگاى هەڵوێستە کردن بو، تەنانەت فراکسیۆنى یەکێتیش پشتیوانى بڕیارەکەى سەرۆکى پەرلەمانیان نەکرد و رەخنەیان لێگرت و دەڵێت، ئەم بڕیارە هیچ پاڵپشتیەکى پەیڕەوى ناوخۆى پەرلەمانى نیە و لێدانە لە شکۆ و ئەرک و بەرپرسیارێتى پیشەیی کارى پەرلەمانى.

ئێستا سەرۆکى پەرلەمان بژاردەکانى زۆر نین، یان دەبێت بڕیارەکەى هەڵوەشێنێتەوە، یان دەبێت بەردەوام بێت لە بڕیارەکەى؟ کە لە هەردوو بارەکەدا بڕیارەکان ئاسان تێناپەڕن، ئەگەر هەڵیوەشێنێتەوە دەکەوێتە بەردەم بەرپرسیارێتى گەورە، کە چۆن دەکرێت بڕیارێکى لەوشێوەیە بەبآ هۆکار و بەڵگە بدات، بەپێچەوانەشەوە ئەگەر هەڵینەوەشێنێتەوە بڕیارەکە وەک سنوردارکردنى کارى پەرلەمانى سەیردەکرێت و بە خاڵێکى نەرێنى بەسەریدا دەشکێتەوە.
لە هەردوو بارەکەشدا پێویستە رێواز فایەق، ئەوە بۆ پەرلەمان و راى گشتى ئاشکرابکت، کێن ئەو پەرلەمانتارانەى رەشوەیان وەرگرتوە و لە کەیسى وەرگرتنى بەرتیل تێوەگلاون؟!