" دەزانن کە پیرو بێکەس و نەخۆشم و بەو زووانە تەفروتونا دەبم، ئەوسا بە کەمێک دەستکارییەوە، بەناوی خۆیانەوە چاپیدەکەن و شەقێک لەناو من هەڵدەدەن". دکتۆر جەمال نەبەز لە کتێبی " ناسنامەو بەسەرهاتم" دا کە بەشێک لەبیرەوەرییەکانی ژیانییەتی، ئەم گلەیی و سکاڵایەی " گیو موکریانی تۆمار کردووە.
وەکو دکتۆر جەمال نەبەز باسیکردووە، گیو موکریانی ئەو گلەییەی لە " کۆڕی زانیاری کورد" کردووەو وتوویەتی ئەو فەرهەنگەی کە پێمداون تا چاپی بکەن، بە بیانووی ئەوەی کە ڕێنووسەکەی دەخەنە سەر ڕێنووسی کۆڕو دواتر چاپی دەکەن، نەک هەر چاپیان نەکردووە، بەڵکو دواتر هەژار موکریانی کە ئەندامی " کۆڕی زانیاری کورد" بووە، بە هەندێک زیادکردنەوە بەناوی خۆیەوەو بەناوی فەرهەنگی " هەنبانە بۆرینە"وە چاپی کردووەو بڵاوی کردووەتەوە.
جەمال نەبەز لە بیرەوەرییەکانیدا دەڵێت:" مامۆستا فەرهەنگێکی گەورەی بە دەستەوە بوو، لە ساڵی ۱۹٦۱ چاوم بە ڕەشنووسەکەی کەوت کە هەفسەد لاپەڕەیەک دەبوو، وەک لە نامەیەکی مامۆستا گیودا کە پێش کۆچی دوایی بەماوەیەکی کورت بە هاوبیری هێژام فایەق ئارفدا بۆمی ناردووە بۆ بەرلین و لە ٦ ــ ۷ ـ ۱۹۷۷ دا درایە دەستم، لەو نامەیەدا دەنووسێت کە فەرهەنگێکی گەورەی ئارەوی ــ کوردی لە ساڵی ۱۹۷۳ دا لە ۱۲٨٦ لاپەڕەی فولسکاپدا، لەسەر داخوازی کۆڕی زانیاری کورد لە بەغداد پێشکەشی کردوون بە خۆڕایی، کۆڕ وێنەیەکی لەبەر گرتووەتەوە، بە بیانووی ئەوەی کە ڕێنووسەکەی دەخەنە سەر ڕێنووسی کوڕ، ئەوجا نە چاپیدەکەن و نە دەستنووسەکەی خۆی بۆ دەنێرنەوەو نە چاپیدەکەن و نە کۆپییەکەشی دەدەنەوە.
وەکو لە بیرەوەرییەکانیدا باسیکردووە، گیو موکریانی لە نامەکەیدا بۆ دکتۆر جەمال نەبەز، پێیووتووە کە بۆیە ئەو نامەیەی بۆ ئەو نووسیوەو وەسیەتی بۆ کردووەو باسی ئەو فەرهەنگەی کردووە، بۆ ئەوەی دوای مردنی گیو موکریانی لەو فەرهەنگە ئاگاداربێت.
جەمال نەبەز، لە کتێبی " ناسنامەو بەسەرهاتم" دا لە زاری گیو موکریانییەوە دەڵێت:" دەزانن پیرو بێکەس و نەخۆشم و بەو زووانە تەفروتونا دەبم، ئەوسا بە کەمێک دەستکارییەوە بەناوی خۆیانەوە چاپی دەکەن و شەقێک لەناوی من هەڵدەدەن.
جەمال نەبەز دەڵێت:" پێشبینییەکەی مامۆستا گیو ڕاستدەرچوو، ئاشکرایە هەژار موکریانی کە لەوکاتەدا لەبەر خاتری مەلا مستەفای بارزانی کە هەژاری بە دۆستی خۆی دەزانی کرابووە ئەندامی " کۆڕی زانیاری کورد"، پاش هەرەسهێنانی شۆڕشی ئەیلوول لە بەهای ۱۹۷٥ دا، هەژار چووەوە بۆ ئێران و لەپڕ فەرهەنگێکی کوردی ــ فارسی گەورەی دەرکرد بەنێوی " هەنبانە بۆرینە"وە.
وەکو لە بیرەوەرییەکانیدا باسیکردووە، گیو موکریانی لە نامەکەیدا بۆ دکتۆر جەمال نەبەز، پێیووتووە کە بۆیە ئەو نامەیەی بۆ ئەو نووسیوەو وەسیەتی بۆ کردووەو باسی ئەو فەرهەنگەی کردووە، بۆ ئەوەی دوای مردنی گیو موکریانی لەو فەرهەنگە ئاگاداربێت.
وەکو خۆی باسیدەکات، پاش ئەوەی کە نامەکەی گیو موکریانی بەدەست دەگات، لە مانگی یازدەی ۱۹۷۷دا وتارێکی دەربارەی چەند زاراوەیەکی تازە بەکارهاتووی کۆڕی زانیاری کورد، لە گۆڤاری کۆلێجی ئەدەبیاتی بەغداد دا بڵاوکردووەتەوە لەوێدا باسی فەرهەنگەکەی گیو موکریانیشی کردووەو وەکو ئەو باسیکردووە دارو دەستەی کۆڕی زانیاری کورد نقەیان لێوەنەهاتووە.
دکتۆر جەمال نەبەز، باسلەوەش دەکات کە جارێکی دیکە لە ژمارە ۲۲٥ی بەرواری ۲۹ ــ ٨ ــ ۲۰۰٦ی هەفتەنامەی میدیادا لەژێر ناونیشانی " کۆڕی زانیاری و ئەکادێمیای کوردی"دا ئەم باسەی کردووەتەوەو نووسیوویەتی فەرهەنگی " هەنبانە بۆرینە"ی هەژار موکریانی هەر فەرهەنگەکەی مامۆستا گیو موکریانییە، بەڵام فارسییەکەی بۆ زیاد کراوە لەگەڵ ناوی سەدان گوندی کوردستان.
وەکو جەمال نەبەز لە کتێبی " باسنامەو بەسەرهاتم"دا ئاماژەی پێداوە، لەپاش بڵاوبوونەوەی ئەو وتارەی " حەسەنی قازی" بە بێ ئەوەی ئاگای لە کێشەکە بێ کەوتووەتە بەرگری لە لەهەژار موکریانی بۆیە ئەوەیش ناچار بووە کە نامەکەی گیو موکریانی کە بۆی ناردووە لە لاپەڕەی خۆیەوە لە تۆڕی کۆمەڵایەتی فەیسبووک بڵاو بکاتەوە.
ئەو بەڵگەی زۆرتر دێنێتەوە دەربارەی ئەوەی کە " هەنبانە بۆرینە" فەرهەنگەکەی گیو موکریانییەو هەژار موکریانی بە هەندێک دەستکارییەوە بەناوی خۆیەوە بڵاویکردووەتەوە، جەمال نەبەز دەڵێت:" دکتۆر کوردستان موکریانی کچی مامۆستا گیو موکریانی شایەتەو خۆشی چەندجار ئەوەی وتووە کە " هەنبانە بۆرینە" فەرهەنگەکەی باوکییەتی بە هێندێک دەستکارییەوە.