دواکەوتنی هەڵبژاردنی پەرلەمانی کوردستان پرسیاری لەسەر هەرێمی کوردستان دروستکردبوو لە ئاستی جیهان و لەئاستی ناوخۆشدا، چونکە ئەزموونی هەرێمی کوردستان جگە لەوەی کورد یەک سەدە قوربانی بۆ داوە لە هەمان کاتدا جیهانی دیموکراسی وەک نمونەیەک و ئەزمونێکی دیموکراسی لەناوچەکەدا پشتگیرییان کردووە. ئەنجامنەدانی هەڵبژاردن واتە کەوتنی دیموکراتی، بۆیە دواکەوتن یاخود ئەنجامنەدانی هەڵبژاردن ببووە نیگەرانییەکی هاوبەشی دۆستانی هەرێم و شەقامی کوردی، چونکە ئەنجامنەدانی هەڵبژاردن دەرگا بۆ هەموو ئەگەرێک دەکاتەوە. دواکەوتنی هەڵبژاردنی پەرلەمانی کوردستان لەوەوە سەرچاوە دەگرێ، کە ئێمە دەستەپاچەین لە بەڕێوەبردنی جیاوازییەکانمان، بەڵام خۆشبەختانە لە ٣ی ٣ی ٢٠٢٤دا سەرۆکی هەرێم واژوی لەسەر دیاریکردنی ڕۆژی ئەنجامدانی هەڵبژاردن کرد، لێرەوە دەرگای لەسەر خەوبینینی ناخۆش داخست، کە خەونیان بە شکستی پرۆسەی دیموکراتی هەرێمەوە دەبینی، لە هەمانکاتدا نیگەرانی جیهانی دیموکراتی و شەقامی کوردی ڕەواندەوە. ئەوەی گرنگ و پێویستە خەڵکی کوردستان و هێزە سیاسیەکان لەبەر چاوی بگرن:

 ١- بە ئارامی بەڕێوەچوونی پرۆسەی دەنگدان.
 ٢- ئەنجامدانی بانگەشەیەکی مەدەنیانە.
 ٣- ڕێگەگرتن لە ساختەکاری.
 ٤- بەشداری زۆرینەی خەڵک لەدەنگدان هێزدانە بە پرۆسەی دیموکراتی و پەرۆشی خەڵک بۆ بەکارهێنان و مومارەسەکردنی مافی خۆی، کە بەشداری سیاسی یە ڕەونەقێکی جوان بەهەرێم دەبەخشێ بۆیە بەشداری زۆرینە لە دەنگدان نیشانەی زیندویەتی میللەت دەردەخات. دەنگدان دەرفەت بە خەڵک دەدات لیستی دڵخوازی خۆیی و کاندیدی دڵخوازی خۆی و شێوازی حوکمڕانی هەڵبژێرێت. ئێمە لە حزبدا دەوڵەمەندین لە چەپەوە بۆ ڕاست حزب لە فەزای سیاسی کوردیدا بونی هەیەو بەئازادی چالاکی خۆی ئەنجام دەدات هەر هاوڵاتیەکیش ئازادە کێ هەڵدەبژێرێت، بۆیە واباشە زۆربەی خەڵک بڕۆنە سەرسندوقەکانی دەنگ دان دەکرێ بڵێین بەشداریکردن لەدەنگدان چارەنوسە کەواتە لە ١٠ی ٦هەرکەس دەتوانێ گۆرانی بۆ لەیلای خۆی بڵێت.